İQTİSADİYYAT


Azərbaycan nümayəndə heyəti liberallaşdırılmış elektrik enerjisi bazarını öyrənmək üçün AİB-in dəstəyi ilə Almaniyada səfərdə olub

Bakı, 21 oktyabr, AZƏRTAC

Oktyabrın 14-18-də Enerji Məsələlərini Tənzimləmə Agentliyinin (AERA) idarə heyətinin sədri Samir Axundov, habelə Energetika və İqtisadiyyat nazirlikləri, Tarif Şurası, “Azərenerji” ASC və “Azərişıq” ASC-nin təmsilçilərindən ibarət Azərbaycan nümayəndə heyəti Asiya İnkişaf Bankı (AİB) tərəfindən maliyyələşdirilən “Enerji sektorunun maliyyə-bərpa planının inkişafı”na texniki dəstək layihəsi çərçivəsində Almaniyaya təşkil edilən səfərdə nəzərdə tutulmuş bir sıra görüşlərə qatılıb.

AERA-dan AZƏRTAC-a bildirilib ki, səfərin əsas məqsədi Azərbaycan nümayəndə heyətinin Almaniya kimi liberallaşdırılmış elektrik enerjisi bazarları haqqındakı biliklərinin artırılması idi.

Səfər zamanı Leypsiqdəki “Power Exchange EEX”də olan nümayəndə heyəti elektrik enerjisinin topdansatış bazarının funksiyaları barədə məlumat əldə edib. Qonaqlar topdansatış qiymətlərinin müəyyən edilməsi qaydaları və elektrik enerjisi istehsalçılarının rəqabət mühiti ilə tanış olublar. Azərbaycan nümayəndə heyəti, həmçinin sistem operatorunun Berlində yerləşən enerji sistemi laboratoriyasına səfər edib. Burada uzunmüddətli şəbəkə planlaşdırması, elektrik stansiyalarının enerji çatdırılması şərtləri ilə çalışan sistem əməliyyatı, bərpaolunan enerjinin inteqrasiya edilməsinə olan ehtiyacla bağlı çağırışlar, həmçinin elektrik balanslaşdırılması üçün bazar və qiymətlərə dair biliklər əldə edilib.

Bundan əlavə, nümayəndə heyəti liberallaşdırılmış bazarın elektrik enerjisi istehsalçılarına təsirinə dair sessiyada iştirak edib, Vuppertal bələdiyyəsi kommunal xidmətlərinə səfər edərək rəqabətli bazarda yekun tariflərin necə müəyyən edildiyini öyrənib.

Azərbaycanlı ekspertlər Bonn şəhərində yerləşən tənzimləyici – Federal Şəbəkə Agentliyini (Bundesnetzargentur) ziyarət etməklə müstəqil bir tənzimləyicinin təbii monopoliya elementlərinin (şəbəkələrinin) tariflərinin tənzimlənməsi və bazara nəzarət vasitəsilə rəqabət elementlərinin aşkar edilməsi işini necə icra etməsinə dair müzakirələrə qatılıblar.

İşgüzar səfər Bonn şəhərində “DNV GL” məsləhət şirkətinin nümayəndələri ilə keçirilmiş görüş ilə yekunlaşıb. Görüş bərpaolunan enerji, həmçinin onun qiyməti və elektrik enerjisi bazarına təsiri məsələlərinə həsr edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.