AZƏRTAC xəbər verir ki, yanvarın 26-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq, əsasən meyvə-tərəvəz və ağartı məhsulları çıxarılmışdı.

“Təzə bazar” MMC-nin həyətindəki yarmarkaya Sabirabad, Salyan, Gədəbəy, Tovuz, Hacıqabul və digər rayonlardan müxtəlif çeşidli kənd təsərrüfatı məhsulları gətirilmişdi.

Kənd Təsərrüfatı Nazirliyi mətbuat xidmətinin rəhbəri Murtuzəli Hacıyev bildirdi ki, burada əhaliyə 21,5 ton məhsul, o cümlədən 3 ton ət, 0,5 ton ağartı, 8 ton tərəvəz, 2 ton kartof, 1 ton bostan bitkisi, 7 ton meyvə, 20 min ədəd yumurta təklif olunur.

Suraxanıda “Günəş” ticarət mərkəzindəki yarmarkada Qobustan, Balakən, Samux, Daşkəsən, Salyan və Biləsuvar rayonlarının fermerləri satışa 19 tona yaxın məhsul çıxarmışdılar.

Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, yarmarkalarda satılan məhsulların qiymətləri bazardakından 25-30 faizə qədər ucuzdur. Satışda meyvə-tərəvəz, bitkiçilik məhsulları, ət-süd çoxluq təşkil edir. Alıcılar məhsulun qiymətindən və keyfiyyətindən razıdırlar.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə alıcılara qiymətləri bazardakından 25-30 faiz ucuz olan 4 tondan çox məhsul təklif olunurdu.

A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada satışa Salyan, Qusar, Dəvəçi, Astara rayonlarından 19 ton tərəvəz, 21 ton meyvə, 3,5 ton ət, 4,5 ton kartof ümumilikdə isə 53 tondan çox müxtəlif çeşidli kənd təsərrüfatı məhsulları gətirilmişdi.

Qusardan 4 tondan çox kələm gətirmiş Qardaşxan Babaşov bir ildən çoxdur ki, bu yarmarkada məhsul satdığını, yaradılmış şəraitdən razılığını bildirdi.

Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Salyan, Ağdaş, Ucar və başqa rayonların fermerləri satışa 8 tondan çox məhsul çıxarmışdılar. Bu yarmarkaya üz tutan hər bir alıcı qiymətlərin bazardakından 25-30 faiz aşağı olduğunu yaxşı bilirdi.

Alıcılardan Babək Abbasov dedi ki, hər həftə buradan kartof, soğan, alma, ət və digər məhsullar alıram. Ölkə başçısının tapşırığı ilə ardıcıl olaraq təşkil edilən yarmarkaların aztəminatlı ailələrin büdcəsinə müsbət təsir göstərdiyini söyləyən qəsəbə sakini bu işi təşkil edənlərə minnətdarlığını bildirdi.

Ucarlı Günəş Əhmədov hər həftə ardıcıl olaraq bu yarmarkaya məhsul gətirdiyini söylədi. Təklif etdiyi malların həvəslə alındığını qeyd edən fermer indiyə qədər burada 5 tondan çox ət və ağartı məhsulları satdığını dedi.

Metronun “Əhmədli” stansiyasının yaxınlığında, Sarayevo küçəsində, “Bakı” kiçik müəssisəsinin “Azər” ticarət mərkəzində paytaxt sakinləri bazardakından xeyli ucuz olan məhsulları həvəslə alırdılar. Onlar yarmarkanın davamlı təşkilinə görə ölkə Prezidentinə minnətdarlıqlarını bildirir, keyfiyyətli və ucuz məhsul gətirmiş fermerlərə təşəkkür edirdilər. Yarmarkada şəhər əhalisinə Salyan, Kürdəmir, Quba, Ağcabədi, Qax, Biləsuvar, Şəki və Qəbələ rayonlarından gətirilmiş meyvə-tərəvəz və digər məhsullar təklif olunurdu.

İşçi qrupunun qərargahından bildirdilər ki, bu yarmarkada satışa 87,7 ton məhsul çıxarılmışdır.

Nərimanov rayonu, Keşlə ticarət mərkəzində təşkil olunmuş yarmarkada alıcılara Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından gətirilmiş 85,6 ton meyvə-tərəvəz, ət-süd məhsulları, Buzovna, Mərdəkan, Giləzi, Goradil broyler fabriklərindən 1,3 tondan çox toyuq əti, 10 min ədəd yumurta təklif olunurdu. Burada mal ətinin kiloqramı 3 man 60 qəpiyə, qoyun əti 4 manata, quş əti 2 man 60 qəpiyə, soğan 20, kök 50, çuğundur, alma 40, kartof 40-50, armud, mandarin 60, yumurtanın bir ədədi 9-10 qəpiyə satılırdı.

Kənd Təsərrüfatı Nazirliyinin nümayəndəsi Savalan Seyfəddinov havaların şaxtalı keçməsinə baxmayaraq, fermerlərin 23 adda məhsul gətirdiyini bildirdi. Alıcılar Gülnaz Nəsibova, Aytən İsrafilova qiymətlərin bazardakından 30-40 faiz aşağı olduğunu vurğulayaraq, yarmarkaların təşkilatçılarından razılıq edirdilər.