RƏSMİ XRONİKA
BAKIDA SƏRBƏST GÜLƏŞ ÜZRƏ 45-Cİ AVROPA ÇEMPİONATININ TƏNTƏNƏLİ AÇILIŞ MƏRASİMİ
AZƏRBAYCAN PREZİDENTİ HEYDƏR ƏLİYEV MƏRASİMDƏ İŞTİRAK ETMİŞDİR
Mayın 2-də Bakı İdman-Konsert Kompleksində sərbəst güləş üzrə 45-ci Avropa çempionatının təntənəli açılış mərasimi olmuşdur.
Azərbaycan Respublikasının Prezidenti Heydər Əliyev təntənəli mərasimdə iştirak etmişdir. Minlərlə tamaşaçı və qonaqlar dövlətimizin başçısını hərarətlə, sürəkli alqışlarla qarşıladılar.
Ölkəmizin paytaxtında ilk dəfə keçirilən, Avropanın 25 ölkəsindən onlarla idmançının iştirak etdiyi bu çempionatda güləşçilər öz qüvvələrini yeddi çəki dərəcəsində sınayacaqlar. Azərbaycan idmançıları tam heyətdə mübarizə aparırlar. Üç gün davam edəcək bu mötəbər yarışın məhz respublikamızda keçirilməsi Azərbaycanda idmana dövlət səviyyəsində göstərilən diqqət və qayğının, ölkəmizdə yaradılmış sabitliyin və əmin-amanlığın təzahürüdür. Bu mühüm amili Avropa çempionatında iştirak etmək üçün Bakıya gəlmiş qonaqlar da yüksək qiymətləndirmişlər.
Çempionatda iştirak edən bütün ölkələrin dövlət bayraqları ilə bəzədilmiş kompleksdə Azərbaycan Prezidentini və bütün yarış iştirakçılarını salamlayan transparantlar asılmışdı.
Azərbaycan, Almaniya, Belarus, Bolqarıstan, Estoniya, Fransa, Gürcüstan, Hollandiya, İngiltərə, İsrail, İspaniya, İsveçrə, İtaliya, Latviya, Litva, Macarıstan, Makedoniya, Moldova, Polşa, Rumıniya, Rusiya, Slovakiya, Türkiyə, Ukrayna və Yunanıstan idmançıları musiqi sədaları altında meydançaya daxil oldular.
Azərbaycan Prezidenti Heydər Əliyevin Avropa çempionatının iştirakçılarına təbriki oxundu.
Mərasimi Azərbaycan Milli Olimpiya Komitəsinin prezidenti, Milli Məclisin deputatı İlham Əliyev açdı.
AZƏRBAYCAN MOK-UN PREZİDENTİ,
MİLLİ MƏCLİSİN DEPUTATI İLHAM ƏLİYEVİN
Ç I X I Ş I
- Möhtərəm cənab Prezident!
Hörmətli xanımlar və cənablar!
Əziz qonaqlar!
Əziz idmançılar!
Bu gün Azərbaycanın idman tarixində çox əlamətdar bir gündür. Bu gün Bakıda sərbəst güləş üzrə Avropa Çempionatı keçirilir. Mən bu münasibətlə sizin hamınızı ürəkdən təbrik edirəm.
Azərbaycan Milli Olimpiya Komitəsi və ölkəmizin bütün idman ictimaiyyəti adından Beynəlxalq Güləş Federasiyasına öz təşəkkürümü bildirirəm ki, onlar bu çempionatın Bakıda keçirilməsi haqqında qərar verdilər, bu idman bayramını bizə bəxş etdilər.
Azərbaycanda güləş milli idman növüdür. Ən məşhur idman növüdür. Bütün dövrlərdə bizim çox güclü güləşçilərimiz olmuşdur və indi də var. Onlar müxtəlif beynəlxalq yarışlarda böyük uğurlar, böyük qələbələr qazanmışlar. Ən parlaq qələbəni Sidney Olimpiya oyunlarında bizim görkəmli idmançımız Namiq Abdullayev qazanmışdır. Namiq Abdullayev bu gün buradadır və mən xahiş edərdim ki, hamımız onu salamlayaq və o gözəl, unudulmaz qələbəsi münasibətilə onu və bütün Azərbaycan xalqını bir daha təbrik edək.
Azərbaycanda idman sürətlə və hərtərəfli inkişaf edir. Bizim idmançılarımız müxtəlif beynəlxalq yarışlarda, Avropa, dünya birinciliklərində, olimpiya oyunlarında uğurla çıxış edir, Azərbaycanın idman şöhrətini yüksəklərə qaldırırlar.
Dövlət tərəfindən də idmana böyük qayğı və diqqət var. Cənab Prezident idmana, onun inkişafına, idmançılara daim böyük qayğı və diqqət göstərir. Bizim bütün qələbələrimiz məhz bu qayğı və diqqət nəticəsində mümkün olmuşdur.
İndi Azərbaycanda idmanla məşğul olmaq üçün hər cür şərait yaradılıbdır. Azərbaycanın müxtəlif bölgələrində yeni, müasir idman kompleksləri tikilir. Bu, möhtəşəm idman sarayında da bir müddət bundan əvvəl təmir işləri aparılmışdır və indi bu kompleks ən yüksək dünya standartlarına cavab verir və Avropa çempionatı kimi mötəbər yarış burada keçirilir.
Əziz dostlar, mən çempionatın açılışı münasibətilə sizi bir daha təbrik edirəm, idmançılara uğurlar, qələbələr arzulayıram. Sağ olun.
X X X
Sonra söz Avropa Sərbəst və Yunan-Roma Güləşi Federasiyasının Prezidenti cənab Tsen Tsenova verildi.
AVROPA SƏRBƏST VƏ YUNAN-ROMA GÜLƏŞİ
FEDERASİYASININ PREZİDENTİ TSEN TSENOVUN
Ç I X I Ş I
-Zati-aliləri, hörmətli cənab Prezident Heydər Əliyev!
Hörmətli Federasiya Prezidenti!
Hörmətli qonaqlar, xanımlar və cənablar!
Bakıda sərbəst güləş üzrə Avropa çempionatının təşkilinə görə Azərbaycanı və onun paytaxtını Beynəlxalq Güləş Federasiyasının prezidenti, idarə heyəti və Avropa Federasiyası adından təbrik edirəm.
Bu gün Bakı Avropanın güləş mərkəzi olmaq hüququnu qazanması sərbəst güləş üzrə ən yaxşı idmançıların yetişdirilməsi, bu ölkədə milli güləşin ənənələri ilə bağlıdır.
Bakıda keçirilən sərbəst güləş üzrə 45-ci Avropa çepionatının təşkilinə görə Azərbaycan Güləş Federasiyasına, bu çempionatın təşkilat komitəsinə və Milli Olimpiya Komitəsinə minnətdarlığımı bildirirəm. Beynəlxalq və Avropa güləş federasiyaları Azərbaycan hökumətinin yarış iştirakçılarına çıxış üçün əla şərait yaratdığını yüksək qiymətləndirir. İnanırıq ki, bu çempionat bizim qitəmizdə böyük idman bayramına çevriləcəkdir. Arzu edir və inanırıq ki, Azərbaycan sərbəst güləş üzrə keçiriləcək növbəti Avropa və dünya çempionatlarının yeni təşkilatçısı olacaqdır.
Çempionatın iştirakçılarına yaxşı çıxış etməyi və qalib gəlməyi arzu edirəm. Arzu edirəm ki, yüksək göstəricilər nümayiş etdirən idmançılar qalib gəlsinlər. Hamıya müvəffəqiyyət arzulayıram. Təşəkkür edirəm.
X X X
Sonra Azərbaycan Güləş Federasiyasının prezidenti, çempionatın təşkilat komitəsinin sədri, baş nazirin birinci müavini Abbas Abbasov çıxış etdi.
AZƏRBAYCAN GÜLƏŞ FEDERASİYASININ
PREZİDENTİ ABBAS ABBASOVUN ÇIXIŞI
-Möhtərəm cənab Prezident!
Hörmətli qonaqlar, dostlar!
Hörmətli xanımlar və cənablar!
İcazə verin, Təşkilat komitəsi adından Azərbaycan Respublikasının Güləş Federasiyası adından bütün idmançılarımızı, idmansevərlərimizi Bakıda sərbəst güləş üzrə 45-ci Avropa çempionatının keçirilməsi münasibətilə təbrik edim, hamıya uğurlar arzulayım.
Azərbaycan Respublikasında bu çempionatın keçirilməsinə qərar verən Beynəlxalq Güləş Federasiyasının nümayəndələrinə səmimi qəlbdən minnətdarlığımı və təşəkkürümü bildirirəm. Belə mötəbər idman yarışının Azərbaycanda keçirilməsi son illər respublikamızda əldə olunmuş ictimai-siyasi sabitliyin nəticəsidir.
Bir həftə bundan öncə Milli Olimpiya Komitəsinin prezidenti hörmətli İlham Əliyevin tapşırığı ilə mən və Azərbaycanın gənclər, idman və turizm naziri Əbülfəz Qarayev İsveçrədə Beynəlxalq Olimpiya Komitəsinin prezidenti cənab Jak Roqq ilə görüşdük. Bu görüş zamanı cənab Jak Roqq bizə dedi ki, son zamanlar Azərbaycan Respublikasında milli olimpiya hərəkatının vüsəti, Milli Olimpiya Komitəsinin prezidenti İlham Əliyevin təşəbbüsü ilə respublikamızın bölgələrində inşa edilən yeni idman kompleksləri nəinki Azərbaycanın Avropada təmsil olunmasına imkan yaradır, hətta Azərbaycanın idman sahəsində dünya miqyasında yüksək səviyyəli ölkələrin sırasında dayanmasını göstərir. Milli Olimpiya Komitəsinin rəhbərliyi altında bütün idman növlərinin inkişafı, idmançılara olan yüksək qayğı və diqqət, onlara lazımi şəraitin yaradılması bir daha göstərir ki, Azərbaycan idmançıları, o cümlədən sərbəst və yunan-roma güləşi üzrə pəhləvanlar yüksək nailiyyətlər, qələbələr əldə edəcəklər.
Azərbaycanda gənclərin bədən tərbiyəsi və idmanla məşğul olmasına göstərilən qayğıya görə ölkəmizin Prezidenti möhtərəm cənab Heydər Əliyevə respublika federasiyası adından dərin minnətdarlığımı bildirirəm. Milli Olimpiya Komitəsinin rəhbəri cənab İlham Əliyevə təşəkkürümü bildirirəm.
Bütün idmançılarımızı təbrik etməklə yanaşı, çox sevinirəm ki, belə mötəbər yarış Azərbaycanda keçirilir. Yarış iştirakçılarına uğurlar arzulayıram.
X X X
Sonra sərbəst güləş üzrə 45-ci Avropa çempionatı açıq elan edildi.
Azərbaycanın dövlət himni əzəmətlə səsləndi.
Milli güləş fəndlərini nümayiş etdirən pəhləvanlarımızın, Dövlət Rəqs Ansamblı üzvlərinin, incəsənət ustalarının çıxışları İdman-Konsert Kompleksinə toplaşan minlərlə tamaşaçılar, idmansevərlər tərəfindən alqışlarla qarşılandı, güləşçilərimizi qələbələrə ruhlandırdı.
Təntənəli açılış mərasimi başa çatdıqdan sonra 55, 66 və 84 kiloqram çəki dərəcəsində yarışan idmançılar mübarizəni davam etdirdilər. Həmin çəki dərəcələrində respublikamızın şərəfini Nazim Əlicanov (55 kq), Elman Əsgərov (66 kq), Fuad Qarayev (84 kq) qoruyurdular. N.Əlicanov və E.Əsgərov keçirdikləri hər üç görüşdə qələbə qazandılar. F.Qarayev isə Belarus idmançısına uduzduqdan sonra mübarizəni dayandırmalı oldu.
X X X
Milli Məclisin sədri Murtuz Ələsgərov, baş nazir Artur Rasizadə, parlament sədrinin və baş nazirin müavinləri, nazirlər, komitə, şirkət rəhbərləri, Milli Məclisin deputatları, xarici ölkələrin Bakıdakı səfirləri və digər rəsmi şəxslər çempionatın açılış mərasimində iştirak edirdilər.
Foto Oqtay Aydınoğlunundur