AZƏRTAC xəbər verir ki, fevralın 7-də Bərdə Rayon icra Hakimiyyətində 2007-ci ilin sosial-iqtisadi inkişafının yekunları və 2008-ci ildə qarşıda duran vəzifələrə həsr olunmuş hesabat yığıncağı keçirilmişdir.

Yığıncaq iştirakçıları əvvəlcə ulu öndər Heydər Əliyevin abidəsini ziyarət etmiş, önünə gül-çiçək düzmüşlər.

Hesabat yığıncağında rayon icra hakimiyyətinin başçısı İlham Ağayev 2007-ci ilin yekunları və qarşıda duran vəzifələr barədə geniş məruzə etmişdir. Məruzəçi regionların sosial-iqtisadi inkişafı Dövlət proqramı çərçivəsində rayonda görülən işlərdən danışmış, iqtisadiyyatın sürətlə inkişaf etdiyini vurğulamışdır. Qeyd etmişdir ki, Prezident İlham Əliyevin 2008-ci ildə regionlara səfərinin Qarabağdan, cəbhə bölgəsindən başlanması, buradakı görüşlərdə verdiyi bəyanatlar böyük ruh yüksəkliyi yaratmışdır. Son vaxtlar ölkəmizin Prezidenti üç dəfə Bərdədə olmuş, bu səfərlər zamanı verdiyi tapşırıqlar əsasında inşa olunan məktəblər, idman konpleksləri, səhiyyə obyektləri, yaşayış binaları, körpülər Bərdənin tarixinə əbədi həkk olunmuşdur.

Ötən ilin sosial-iqtisadi inkişafından danışan məruzıçi qeyd etmişdir ki, rayon iqtisadiyyatının əsas sahələri üzrə məhsul istehsalının həcmi 126,4 milyon manat təşkil etmişdir. Bu isə 2006-cı ilə nisbətən 20,1 faiz və ya 21,1 milyon manat çoxdur. Sənaye müəsissələrində 5,1 milyon manatlıq və ya əvvəlki ilə nisbətən 20,8 faiz çox məhsul istehsal edilmişdir. İnvestisiya xərcləri 9,2 milyon manat və ya 2006-cı ilə nisbətən 5,1 faiz çox olmuşdur.

2007-ci ildə 2006-cı illə müqaisədə kənd təsərrüfatının ümumi məhsulu 17,2 faiz artaraq 88 milyon manat təşkil etmişdir. 26 maldarlıq ferması binası, 4 süd emalı sexi tikilmişdir. Əkin sahələrinin suvarma suyuna olan tələbatının ödənilməsi üçün 11 subartezian quyusu istifadəyə verilmişdir.

İl ərzində rayonda 8 həkim ambulatoriyası, 2 feldşer-mama məntəqəsi, 90 çarpayılıq uşaq xəstəxanasının birinci növbəsi istifadəyə verilmiş, doğum evində təmir işləri aparılmışdır. Hazırda müasir Diaqnostika Mərkəzinin tikintisi davam edir.

Bərdədə 1000 şagird yeri olan məktəb binası tikilmiş və bu təhsil ocağına akademik Zərifə xanım Əliyevanın adı verilmişdir. Kəndlərdə Heydər Əliyev Fondunun dəstəyi ilə 3, büdcə vəsaiti hesabına isə 4 məktəb binası inşa olunmuşdur.

Rayon üzrə hər 100 ailəyə düşən telefon aparatının sayı 11,1 faiz artaraq 50 ədəd olmuşdur. Şəhərdə bu göstərici 91, kəndlərdə isə 33-dür.

Dövlət Proqramında əlillər və şəhid ailələri üçün nəzərdə tutulmuş 16 mənzilli yaşayış binasının əvəzinə 36 mənzilli ev tikilib istifadəyə verilmişdir. Hazırda dövlət xətti ilə 24 mənzilli yaşayış binasının inşası davam etdirilir. 2007-ci ildə rayon məşğulluq mərkəzinə 411 nəfər müraciət etmiş, onlardan 235 nəfəri işlə təmin edilmişdir.

Yığıncaqda cari ildə görüləcək işlərlə əlaqədar tədbirlər planı müzakirə edilmiş və müvafiq qərar qəbul olunmuşdur.

Daxili işlər naziri Ramil Usubov, Milli Məclisin deputatı Zahid Oruc yığıncaqda çıxış etmiş, qarşıda duran vəzifələrdən danışmışlar.

Tədbir iştirakçıları adından Prezident İlham Əliyevə müraciət qəbul etmişlər.

Yığıncağın işində Prezidentin İcra Aparatının məsul işçisi Nuridin Hüseynov iştirak etmişdir.