Cenevrə, 28 may, AZƏRTAC

Mayın 28-də Cenevrədə Azərbaycan Xalq Cümhuriyyətinin 100 illiyinə həsr edilmiş rəsmi qəbul keçirilib.

AZƏRTAC xəbər verir ki, Azərbaycanın BMT-nin Cenevrə bölməsi və digər beynəlxalq təşkilatlar yanında daimi nümayəndəliyi tərəfindən təşkil olunan tədbirdə Cenevrədə yerləşən BMT qurumlarının nümayəndələri, şəhərdə akkreditə olunmuş diplomatik korpusun üzvləri, İsveçrə rəsmiləri, Azərbaycan diasporunun nümayəndələri iştirak ediblər.

Azərbaycanın dövlət himni səsləndirildikdən sonra Azərbaycanın BMT-nin Cenevrə bölməsi və digər beynəlxalq təşkilatlar yanında daimi nümayəndəsi, səfir Vaqif Sadıqov tədbiri giriş sözü ilə açıb. Səfir qeyd edib ki, müsəlman Şərqində ilk demokratik respublika olan Azərbaycan Xalq Cümhuriyyətinin qurulmasının 100-cü ildönümü ölkəmizdə on milyon vətəndaş və ölkə hüdudlarından kənarda yaşayan milyonlarla soydaşımız tərəfindən təntənə ilə qeyd olunur.

Azərbaycanın qədim dövlətçilik ənənələrinə malik olduğunu diqqətə çatdıran V.Sadıqov ən qədim dövrlərdə Azərbaycan ərazisində müxtəlif dövlətlərin təşəkkül tapdığını və zərdüştilik və xristianlıq kimi dinlərin yayıldığını diqqətə çatdırıb. Bildirilib ki, eramızın VIII əsrindən etibarən İslam dini Azərbaycan ərazisində hakim dinə çevrilib və Xilafətin zəifləməsi ilə ilk Azərbaycan dövlətləri meydana çıxıb. XVI əsrdə Şah İsmayıl Xətainin qurduğu Səfəvilər imperiyası dövründə Azərbaycan dövlətinin sahəsi geniş əraziləri əhatə edib, işlək idarəçilik mexanizmləri qurulub və Azərbaycan dili dövlət dili elan edilib. Xanlıqlar dövründə zəif düşən Azərbaycan iki böyük imperiya - Rusiya və İran arasında bölüşdürülsə də, XX əsrin əvvəlində dünyada və regionda baş verən hadisələr Azərbaycan xalqının öz milli dövlətini qurması üçün imkanlar açdı.

1918-ci il mayın 28-də İstiqlal Bəyannaməsi ilə müstəqilliyini elan edən Azərbaycan Xalq Cümhuriyyəti müsəlman Şərqində ilk parlamentli respublika olmaqla, müstəqillik idealları ilə uğurlu bir yola çıxdı. Qısa müddət ərzində ölkədə bütün vətəndaşlara dini, etnik, irqi və sinfi fərq qoymadan bərabər hüquqlar, Şərqdə ilk dəfə olaraq qadınlara seçki hüququ verildi.

Səfir qeyd edib ki, 1919-cu ildə Paris Sülh Konfransında iştirak etmək üçün Fransaya göndərilən Azərbaycan parlament nümayəndə heyəti burada Azərbaycanın müstəqil dövlət kimi tanınmasına nail oldu. Bildirilib ki, BMT-nin Cenevrə bölməsinin kitabxanasında Millətlər Liqasının arxivi yerləşir və burada Azərbaycana aid 36 min səhifəni əhatə edən orijinal sənədlər saxlanılır. Səfir bu sənədlərin rəqəmsal surətlərinin hazırlandığı bir layihənin başa çatması üçün BMT-nin Cenevrə bölməsinin rəhbərliyinə minnətdarlığını ifadə edib.

Daxili və xarici dəyişikliklər fonunda qısa müddət ərzində bir çox uğurlara imza atan gənc Azərbaycan dövlətinin şanlı salnaməsi Azərbaycan xalqının tarixində silinməz izlər buraxıb. 1991-ci ildə müstəqilliyini bərpa edən Azərbaycan Respublikası özünü Azərbaycan Xalq Cümhuriyyətinin xələfi elan etməklə, onun dövlət atributlarını qəbul etdi. Bu gün Azərbaycan Respublikasının Prezidenti İlham Əliyevin rəhbərliyi altında müstəqil, suveren və demokratik bir ölkə olaraq Azərbaycan Xalq Cümhuriyyətinin ideallarını gerçəkləşdirir. Müstəqilliyin ilk illərində çoxsaylı siyasi və iqtisadi problemlərə baxmayaraq, Azərbaycan özünü güclü və dinamik bir dövlət halına gətirib, qonşuları və bütün beynəlxalq ictimaiyyət üçün etibarlı tərəfdaşa çevrilib.

Azərbaycanın beynəlxalq sülhün, təhlükəsizliyin və sabitliyin qorunmasına mühüm töhfələr verdiyini diqqətə çatdıran V.Sadıqov ölkəmizin beynəlxalq hüququn tələb etdiyi kimi, suverenlik, ərazi bütövlüyü və beynəlxalq sərhədlərin toxunulmazlığı əsasında Ermənistan-Azərbaycan, Dağlıq Qarabağ münaqişəsinin siyasi həllinə sadiq olduğunu ifadə edib. Ərazisinin 20 faizi işğal edilən və bir milyon qaçqın və məcburi köçkünə sahib bir ölkə olaraq Azərbaycan münaqişənin ən erkən həllində maraqlıdır.

Ötən il Azərbaycanın BMT-yə üzvlüyünün 25 illiyinin qeyd olunduğunu xatırladan səfir ölkəmizin BMT-nin Azərbaycana davamlı dəstəyini yüksək qiymətləndirdiyini vurğulayıb və öz növbəsində, Azərbaycanın bu beynəlxalq təşkilatın Nizamnaməsinə olan möhkəm bağlılıq nümayiş etdirdiyini, onun fəaliyyətində aktiv iştirak etdiyini qeyd edib.

Sonra V.Sadıqov Bakının “Ekspo 2025" Ümumdünya Sərgisinin ev sahibliyinə namizədliyi ilə bağlı təqdimatla çıxış edib. O, Bakının təklif etdiyi mövzunu – “İnsan kapitalını inkişaf etdirək, daha yaxşı gələcək quraq” və Birləşmiş Millətlər Təşkilatının üç mühüm dayanıqlı inkişaf məqsədi – təhsil, səhiyyə və məşğulluq alt mövzuları barədə danışıb. Bu gün Bakının müxtəlif formatlı beynəlxalq tədbirlərə ev sahibliyi etdiyini yada salan səfir “Ekspo 2025" Ümumdünya Sərgisinin Bakıda baş tutmasının beynəlxalq tədbirlərə ev sahibliyinin təbii və məntiqli davamı olacağını vurğulayıb. O, üzv dövlətləri bu ilin noyabr ayında Parisdə Beynəlxalq Sərgilər Bürosunun iclasında Bakının namizədliyini dəstəkləməyə çağırıb.

Çıxışdan sonra tədbir iştirakçılarına Heydər Əliyev Fondunun dəstəyi ilə Bakı Media Mərkəzi tərəfindən hazırlanan, baş prodüseri Arzu Əliyeva olan “Əbədi ezamiyyət” sənədli filmi təqdim olunub. Tədbir çərçivəsində, həmçinin Azərbaycana həsr olunmuş fotosərgi də nümayiş etdirilib.

Sonda milli və Avropa mətbəxinin təamlarından ibarət ziyafət verilib.

Elgün Niftəli

AZƏRTAC-ın xüsusi müxbiri

Cenevrə