DÜNYA


Beyrut faciəsi qurbanlarının ailələri BMT-yə müraciət ediblər

Qahirə, 15 avqust, AZƏRTAC

Avqustun 4-də Beyrutda baş vermiş dəhşətli partlayışın qurbanlarının ailələri BMT-yə müraciət ediblər.

AZƏRTAC xəbər verir ki, onlar ABŞ-ın Federal Təhqiqat Bürosunun da iştirakı ilə faciənin beynəlxalq səviyyədə təhqiq edilməsini tələb edirlər.

Son məlumata görə, 179 nəfərin həlak olduğu və 6 mindən çox insanın yaralandığı faciənin əsas səbəbinin Livanda tüğyan edən korrupsiya olduğu bildirilir. Həsən Diyabın kabineti də əhalinin etirazları qarşısında istefa verməyə məcbur olmuşdu. Baş Nazir özü də bu faktı etiraf edib.

Vəkil Nada Əbdülsatir bildirib ki, vəziyyətdən yeganə çıxış yolu beynəlxalq səviyyədə təhqiqatın aparılması, BMT Təhlükəsizlik Şurasının xüsusi istintaq qrupu yaratmasıdır. “Bu təhqiqatın nəticələri və faciənin baş verməsində təqsirkar olanlar insanlığa qarşı cinayət ittihamı ilə Beynəlxalq Cinayət Məhkəməsində mühakimə olunmalıdır”, - deyə vəkil vurğulayıb.

BMT-yə müraciəti partlayışdan zərər çəkən minlərlə insan imzalayıb. Müraciətin mətni BMT Təhlükəsizlik Şurasına üzv dövlətlərə göndərilib.

Oqtay Bayramov

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.