CƏMİYYƏT
Cəlilabadda narkotik vasitələrin alqı-satqısı ilə məşğul olan rayon sakinləri saxlanılıblar VİDEO
Bakı, 26 oktyabr, AZƏRTAC
Cəlilabad Rayon Polis Şöbəsi əməkdaşları tərəfindən narkotik vasitələrin qanunsuz dövriyyəsi və alqı-satqısı ilə məşğul olan şəxslərə qarşı növbəti əməliyyat tədbiri həyata keçirilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, Cəlilabad rayonu Günəşli kənd sakini Vasif İsmayılov əldə edilən əməliyyat məlumatı əsasında saxlanılıb. Onun üzərində şəxsi axtarış aparılan zaman kibrit qutusunda qablaşdırılan 2,509 qram qurudulmuş marixuana aşkarlanaraq götürülüb. Əməliyyat tədbirlərinin davamı olaraq V.İsmayılovun idarə etdiyi “VAZ 2121” markalı avtomobildən əlavə olaraq 3,288 qram 12 büküm qurudulmuş marixuana, 2,125 qram narkotik vasitə metamfetamin, 15,487 qram 4 büküm həşiş qətranı və 5 ədəd kibrit qutusunda 28,135 qram çətənə bitkisinin toxumları aşkar olunaraq götürülüb. V.İsmayilov narkotik vasitələrin ona məxsus olduğunu və həmyerlisi Qoşqar adlı şəxsdən aldığını bildirib.
Cəlilabad Rayon Polis Şöbəsinin əməkdaşları keçirdikləri əməliyyat zamanı Vasif İsmayılova narkotik vasitələri satan əvvəllər məhkum olunmuş Alar kənd sakini Qoşqar Məmmədov da tutularaq istintaqa təqdim edilib. Həmin şəxsdən paketdə 975 qram olan həşiş qətranı aşkar olunaraq götürülüb. Q.Məmmədov narkotik vasitələrin satışı ilə məşğul olduğunu etiraf edib.
Faktla bağlı hər iki şəxs barəsində Cəlilabad Rayon Polis Şöbəsinin İstintaq Bölməsində Cinayət Məcəlləsinin müvafiq maddəsi ilə cinayət işi başlanılıb və barələrində məhkəmənin qərarı ilə həbs qətimkan tədbirləri seçilib. İstintaq əməliyyat tədbirləri davam etdirilir.