CƏMİYYƏT
Cinayət-Prosessual Məcəllədə dəyişikliklər edilməsi haqqında Qanun nəyi nəzərdə tutur?
Bakı, 13 iyul, AZƏRTAC
“Azərbaycan Respublikasının Cinayət-Prosessual Məcəlləsində dəyişikliklər edilməsi haqqında” Azərbaycan Respublikasının Qanunu Azərbaycan Respublikası Prezidentinin “Məhkəmə-hüquq sistemində islahatların dərinləşdirilməsi haqqında” 2019-cu il 3 aprel tarixli Fərmanı ilə verilmiş tapşırıqların icrası çərçivəsində hazırlanıb.
AZƏRTAC xəbər verir ki, qanunun məqsədi cinayət mühakimə icraatında müasir informasiya- kommunikasiya texnologiyalarının üstünlüklərindən istifadə olunmasını, habelə xüsusi karantin rejimində və digər xüsusi hallarda cinayət prosesinin videokonfrans əlaqə vasitəsilə davam etdirilməsini təmin etməkdir.
Qanun bütövlükdə cinayət mühakimə icraatında innovativ üsullardan istifadə etməklə səmərəliliyin yüksəldilməsi, məhkəməyə müraciət imkanlarının genişləndirilməsi, habelə süründürməçilik və sui-istifadə hallarının qarşısının alınması məqsədilə hazırlanıb.
İyulun 15-dən qüvvəyə minəcək qanunda nəzərdə tutulan yeniliklər aşağıdakılardır:
- cinayət mühakimə icraatının “Elektron məhkəmə” informasiya sistemi vasitəsilə aparılması qaydası müəyyən olunur;
- cinayət prosesi iştirakçılarının məhkəmə və istintaq orqanına gəlmədən videokonfrans əlaqə sistemindən istifadə etməklə prosesdə iştirakı prosedurları tənzimlənir;
- cinayət mühakimə icraatının məhkəmə protokollarında tam və hərtərəfli əks etdirilməsi məqsədilə məhkəmə iclaslarının fasiləsiz audio yazısının aparılması tələbi əks etdirilir;
- iqtisadi sahədə olan cinayətlərə görə zərərçəkmiş şəxslə barışma, ziyanın ödənilməsi və dövlət büdcəsinə ödəniş edilməsi şərti ilə cəzadan azad etmənin qaydası nəzərdə tutulur;
- məhkəmə icraatı uzadılmadan hazırlıq iclasında cinayət təqibinə xitam verilməsi imkanları genişləndirilir;
- kassasiya şikayəti (protesti) verilməsi müddətləri qısaldılır, habelə onların verilməsi və baxılması qaydası təkmilləşdirilir;
- xarici dövlətlərin məhkəmələrinin hökmlərinin və ya digər yekun qərarlarının tanınması üzrə icraatın aparılması qaydası müəyyən edilir.