Bakı, 17 avqust, AZƏRTAC

Müstəqilliyini bərpa etdikdən sonra Azərbaycanda dövlət quruculuğu və iqtisadiyyatın şaxələndirilməsi istiqamətində ardıcıl işlər görülüb. Dünya arxitekturasının dəyişdiyinin müşahidə olunduğu bir zamanda, xüsusən Dördüncü Sənaye İnqilabının gətirdiyi yeni çağırışlar fonunda Azərbaycan postpandemiya və postmüharibə dövründə yeni inkişaf mərhələsinə qədəm qoyub.

Bu gün Azərbaycanda müşahidə etdiyimiz vacib məsələlərdən biri də ölkə iqtisadiyyatının Prezident İlham Əliyevin rəhbərliyi dövründə dəfələrlə böyüməsi, əhalinin nominal gəlirlərinin 10 dəfə, ümumi daxili məhsulun (ÜDM) istehsalının 2003-cü illə müqayisədə 8,3 dəfə artması, eləcə də cari ilin dövlət büdcəsinin xərc hissəsinin təqribən 29 milyard manat təşkil etməsidir.

Bunu AZƏRTAC-a açıqlamasında Milli Məclisin deputatı Məzahir Əfəndiyev söyləyib.

O bildirib ki, qlobal arenada iqtisadi cəhətdən əsaslandırılmamış baş verən hadisələri nəzərə almasaq, ölkəmiz dünya iqtisadiyyatına uğurla inteqrasiya etməkdədir. Ölkə iqtisadiyyatının davamlı olaraq şaxələndirilməsi, qeyri-neft sektorunun çəkisinin artması və inkişaf etdirilməsi ilə yanaşı, neftdən asılılığın aradan qaldırılması istiqamətində böyük işlər görülməkdədir. Dövlət Neft Fondundan dövlət büdcəsinə olunan transfertlərin ildən-ilə azalması göz qabağındadır. Bu ilin altı ayı ərzində qeyri-neft sektorunda müşahidə olunan müsbət dinamika Dövlət Neft Fondunun aktivlərindən qənaətlə istifadə etməyə imkan yaradıb.

Eyni zamanda, Azərbaycanın iqtisadi asılılığının gündən-günə aşağı düşməsi xarici borcumuzun azalması ilə də şərtlənir. Belə ki, bu gün xarici dövlət borcumuz ÜDM-in 11,7 faizini təşkil edir. Həyata keçirilən bu məqsədyönlü siyasətin əsas fəlsəfəsi Azərbaycanın malik olduğu öz potensialını və daxili imkanlarını daha da genişləndirməsinə yönəlib.

“Qarşıya qoyulan hədəflərə nail olmaq üçün bu gün kənd təsərrüfatı sahəsində dövlət tərəfindən müəyyən olunmuş sahibkarlara göstərilən dəstək daha da artırıla bilər. Onların fəaliyyətinin monitorinqini və əlaqələndirilməsini aparmaqla qısa zamanda əhalinin kənd təsərrüfatı məhsullarına tələbatının daxili istehsal hesabına tam ödənilməsi təmin ediləcək. Həmçinin ölkədə mövcud olan turizm potensialının düzgün istifadə olunmaqla bütün istiqamətlərdə müasirləşdirilməsi turizm sahəsinin dövlət büdcəsinin formalaşmasında, habelə ÜDM-də payının artmasında rolunu daha da artıracaq.

Avqustun 12-də Prezident İlham Əliyevin Qobustan, İsmayıllı və Ağsu rayonlarına səfərləri çərçivəsində açılışlarında iştirak etdiyi obyektlərin gələcək fəaliyyəti bilavasitə ölkə iqtisadiyyatının, xüsusən də turizm siyasəti və sahibkarlığın inkişafına dəstək olacaq. Basqalda istifadəyə verilmiş 179 otaqdan ibarət otel region əhalisinin ictimai-mədəni və sosial həyatına da müsbət təsir göstərməklə yanaşı, bölgənin turizm potensialını daha da gücləndirəcək”, - deyə deputat qeyd edib.

Onun sözlərinə görə, regionlarda işsizliyin aradan qaldırılması, habelə büdcə yükünün azaldılmasına yönələn iqtisadi subyektlərin açılması ölkə iqtisadiyyatının dayanıqlı inkişafının göstəricilərindəndir.

Deputat diqqətə çatdırıb ki, səfər çərçivəsində Prezident İlham Əliyev Ağsu şəhərindəki Bayraq meydanında Gənc Sənətkarlar Mərkəzinin və Dövlət Rəmzləri Muzeyinin də açılışında iştirak etdi. Azərbaycanın dövlət atributlarını, habelə mədəni həyatını müasir çağırışlarla zənginləşdirən muzeylərin, mərkəzlərin açılışları gələcək nəsillər qarşısında Azərbaycanın dövlətçilik ənənələrinin və tarixinin yüksək səviyyədə təbliğinə böyük töhfədir.

“Ölkəmizdə həyata keçirilən bütün tədbirlər iqtisadi artım tempini qoruyub saxlamaqla yanaşı, cəmiyyəti bu gün daha çox narahat edən işsizlik probleminin həll olunmasının zəruriliyini ortaya qoyur, həmçinin həyat üçün vacib bütün sahələrin hər zaman dövlətimizin başçısının tam nəzarəti altında olduğunu bir daha sübut edir”, - deyən M.Əfəndiyev fikirlərini yekunlaşdırıb.