ELM VƏ TƏHSİL
“Education 2018” dünyanın 12 ölkəsindən 90-dan çox fakültəni təqdim edir VİDEO
Bakı, 10 oktyabr, AZƏRTAC
Oktyabrın 11-dən 13-dək Bakı Ekspo Mərkəzində keçiriləcək “Education 2018” sərgisi dünyanın 12 ölkəsindən 135 iştirakçını bir araya gətirərək 90-dan çox fakültəni təqdim edir.
AZƏRTAC xəbər verir ki, bu məlumatı XII Azərbaycan beynəlxalq təhsil sərgisi - “Education 2018” ilə bağlı oktyabrın 10-da Bakıda keçirilən mətbuat konfransında “Caspian Event Organisers”(CEO) şirkətinin rəhbəri Edvard Stron açıqlayıb.
O bildirib ki, beynəlxalq sərgi hər il aparıcı ali məktəbləri və orta ixtisas təhsili müəssisələrini, ixtisasartırma mərkəzlərini bir araya gətirir. Təhsil sərgisi hər kəsə həm ixtisas, həm də təhsil müəssisəsi seçmək üçün geniş imkan yaradan unikal platformadır. Sərgi Təhsil Nazirliyi ilə yanaşı, Kiçik və Orta Biznesin İnkişafı Agentliyi, Azərbaycanda İxracın və İnvestisiyaların Təşviqi Fondu (AZPROMO) və Sahibkarlar (İşəgötürənlər) Təşkilatları Milli Konfederasiyası tərəfindən də dəstəklənir. Sərginin təşkilatçısı CEO şirkəti, baş sponsoru isə “Kapital Bank”dır.
Təhsil Nazirliyi geniş pavilyonla təmsil olunacaq
Təhsil Nazirliyinin sektor müdiri Cəsarət Valehli bildirib ki, sərgidə Təhsil Nazirliyi geniş pavilyonla təmsil olunacaq. Azərbaycanın 14 ali təhsil müəssisəsinin qatıldığı sərgidə iştirakçılara “Məktəbəhazırlıq”, “Olimpiadalara Hazırlıq Mərkəzi”, “Peşə Təhsili üzrə Dövlət Agentliyi”, “Təhsil” Respublika İdman Mərkəzi”, “Uşaq-Gənclər İnkişaf Mərkəzi”, “SABAH” qrupları”, “İçərişəhər Ənənəvi İncəsənət Mərkəzi”, “Sağlam təhsil-sağlam millət”, “Maarifçi” Tələbə Kredit Fondu”, “Məktəblinin dostu”, “Modul tipli məktəblər”, “IT STEP”, “Media Mərkəz - Təhsil TV” və digər stendlər təqdim ediləcək. Sərginin gündəliyinə işgüzar görüşlər, panel müzakirələr, media-təqdimatlar və ayrı-ayrı mövzulara dair mühazirələr daxildir.
Sərgidə Təhsil Nazirliyi tərəfindən təşkil edilən stenddə Azərbaycan Dillər Universiteti, Dövlət Neft və Sənaye Universiteti, Dövlət İqtisad Universiteti, Dövlət Pedaqoji Universiteti, Memarlıq və İnşaat Universiteti, Azərbaycan Texniki Universiteti, Azərbaycan Texnologiya Universiteti (Gəncə), Bakı Dövlət Universiteti, Mühəndislik Universiteti, Bakı Slavyan Universiteti, Fransa-Azərbaycan Universiteti (UFAZ), Lənkəran Dövlət Universiteti və digər təhsil müəssisələri yer alır.
ADA Universiteti, Milli Aviasiya Akademiyası və Azərbaycan Universiteti sərgidə öz stendləri ilə çıxış edəcək. Ümumilikdə, Azərbaycanın 18 ali təhsil müəssisələri sərgidə təmsil olunacaq.
Sərginin builki debütantları
Bu il “Dərs Evi” təhsil sahəsində fəaliyyət göstərən innovativ şirkət və “Sevimli Bala” uşaq bağçası sərgidə debüt edir, yerli “CELT Colleges” şirkəti isə xaricdə təhsil proqramı və həmçinin dil kursları ilə çıxış edir.
“Education 2018” sərgisinin "Xaricdə təhsil" sektorunun daxilində Çex Respublikası, Gürcüstan, Latviya, Litva, Rusiya, Türkiyə və digər ölkələri təmsil edən iştirakçılar öz məktəb, gimnaziya, kollec, universitet və kurslarını təqdim edəcəklər. Litva (Study in Lithuania), Rusiya, Türkiyə (Study in Turkey) və Çex Respublikası öz təhsil ocaqlarında təhsil imkanlarının nümayiş olunduğu milli stendləri ilə təmsil olunacaqlar.
Bir sıra yerli və xarici şirkətlərin korporativ sosial məsuliyyət siyasəti çərçivəsində, həyata keçirilən ali təhsil və sosial inteqrasiya vasitəsilə Azərbaycan gəncliyinin dayanıqlı inkişafına yönəlmiş "Gələcəyini qur!" gəncliyə dəstək layihəsi də sərgidə iştirak edir.
Geniş işgüzar proqram və ya hansını seçmək lazımdır?
Təhsil müəssisələrinin ən müasir texnologiyalarla təchizi gündəmdə olan məsələdir. Sərgi bu avadanlığın təchizatçı və istehsalçıları ilə tanış olmaq, onlarla əlaqə yaratmaq üçün əla imkan yaradır. Sərgidə “Lucas-Nuelle GmbH”, “NTP Centr” (Belarus), “Didactic systems” (Rusiya), “Uchtech-Profi” (Rusiya) və “El Xolding” (Özbəkistan) şirkətləri tərəfindən “Təhsil müəssisələri üçün müasir avadanlıq və multimedia sistemləri” sektoru çərçivəsində laboratoriya avadanlığı, təhsil müəssisələri üçün proqram təminatı nümayiş olunur.
Bu il "Təhsil" sərgisi geniş işgüzar proqramı ilə fərqlənəcək. Sərginin işgüzar proqramı çərçivəsində valideynlər və sərgi iştirakçıları, eləcə də iştirakçılar və xaricdə təhsil məsələləri ilə məşğul olan şirkətlər arasında iki tərəfli görüşlər keçiriləcək. Sərginin ikinci günü “Xaricdə və ya Azərbaycanda təhsil? Hansını seçmək lazımdır?” və “Böyümək dövrləri” adlı müzakirələrdə məşhur bloggerlər, yerli və xarici nümayəndələr iştirak edəcəklər. Sərginin işgüzar proqramını “Mənim uğurumun hekayəsi” adlı tədbir yekunlaşdıracaq. Bu tədbirdə, sərgidə təqdim olunan universitetlərin məzunları öz fəaliyyətləri, təcrübələri və təhsillərində əldə etdikləri nailiyyətlər barədə ziyarətçilər ilə bölüşəcəklər.
“Xaricdə təhsil üçün sizə kömək edəcək 7 sual” və “Tələbəliyə doğru 5 addım" adlı seminarlar abituriyent və onların valideynlərində maraq doğuracaq. Sərginin bütün günləri, Rusiya universitetlərinin təqdimatı keçiriləcək. Tədbirin ikinci günündə "Rusiya Federasiyasında xarici vətəndaşların təhsil imkanları və üstünlükləri" mövzusunda seminar təşkil olunacaq.
Bundan başqa, sərgi günlərində foyedə dünyanın ən maraqlı “My Mirror” selfie-güzgüsü, həmçinin oyun zonası fəaliyyət göstərəcək.