Biləsuvar, 1 avqust, Mahir Babayev, AZƏRTAC 

Uzun illərdir pambıq əkini ilə məşğul oluram. Bu sahədə yaxşı təcrübəm var. Ona görə də hər ili yüksək göstəricilərlə başa vururam. Pambıqçılıqda qazandığım uğurlar həm də dövlətimizin dəstəyinin nəticəsidir. Son illər Prezident İlham Əliyevin rəhbərliyi ilə aqrar sektorun digər sahələri ilə yanaşı, pambıqçılığın inkişafına da hərtərəfli dəstək göstərilir. O cümlədən son məhsula görə verilən subsidiyalar, məhsulun alış qiymətinin ilbəil artırılması, gübrə, toxum dərman preparatlarının əldə olunmasında tətbiq edilən güzəştlər bütün əkinçilər kimi mənim də işə olan maraq və məsuliyyətimi artırıb.

AZƏRTAC-ın bölgə müxbiri xəbər verir ki, bu sözləri biləsuvarlı pambıqçı Fazil Musayev deyib.

Göstərilən hərtərəfli dəstəyə öz işi ilə qarşılıq verməyə çalışdığını bildirən fermer qeyd edib ki, əməyi dövlətimiz tərəfindən layiqincə qiymətləndirilib: “Birinci dərəcəli əmək ordeninə layiq görülmüşəm. Əməyimin layiqincə qiymətləndirilməsi işə olan marağımı daha da artırıb. Ötən il əkin sahəsini genişləndirərək 40 hektara çatdırdım. Sahənin hər hektarından 38 sentner məhsul götürməklə 150 ton pambıq istehsal edib, satdım. Cari təsərrüfat ilində isə 70 hektar sahədə pambıq becərirəm”.

Pambıq sahələrində bütün aqrotexniki tədbirləri vaxtlı-vaxtında yerinə yetirən fermer bitkini su, gübrə ilə təmin edib, ziyanvericilərə qarşı profilaktik tədbirlər görüb. “Çəkdiyim zəhmət hədər getməyib. Artıq bitki bar mərhələsindədir. Bol məhsul götürmək üçün becərmənin bundan sonrakı mərhələlərinə də düzgün əməl etməyə səy göstərəcəyəm. Çalışacağam ki, dövlətimiz tərəfindən biz pambıqçılara göstərilən hərtərəfli qayğıya layiqli əmək göstəriciləri ilə cavab verim”, - deyə F.Musayev vurğulayıb.