MƏDƏNİYYƏT


Fevzi Əkrəm Terzioğlu: Bir gündə 650 min ağac əkilməsi Nəsimi şəxsiyyətinin əbədiyaşarlığına verilən ən böyük dəyərdir

Ankara, 6 dekabr, AZƏRTAC

Azərbaycanın müstəqilliyi, dövlətimizin çoxistiqamətli inkişafı, qazandığımız böyük uğurlar, o cümlədən dünya birliyinə sürətli inteqrasiyamız təkcə vətəndaşlarımız üçün deyil, o cümlədən dünyanın ayrı-ayrı ölkələrində yaşayan soydaşlarımız, eləcə də türk dünyasına bağlı olan milyonlar üçün sevindiricidir. Bu qəbildən olan şəxslər üçün Azərbaycan, ölkəmizə bağlı olan hər bir məsələ diqqətlə izlənilməkdədir. Bugünkü qonağımız İraq Ədəbiyyatçılar və Yazıçılar Birliyinin Türkmən Mədəniyyət bürosunun sədri, İraq parlamentinin sabiq üzvü Fevzi Əkrəm Terzioğlu da bu qəbildən olan şəxsiyyətlərdəndir. Müsahibimlə Ankarada Türk Mədəniyyəti Təşkilatının (TÜRKSOY) mərkəzi qərargahında görüşdük. Salamlaşmadan dərhal sonra ağızdolusu təşəkkür etdi. Səbəb TÜRKSOY-da İraq türkmənlərinin böyük şairi Telaferli Felekoğlunun həyat və yaradıcılığına həsr olunan konfransda iştirak etməyim idi. Böyük şairin anadan olmasının 90 illiyinə ithaf olunan tədbirdə həm də onun həyat və yaradıcılığını əks etdirən "Açıl dilim açıl" kitabının təqdimatı oldu. Beləliklə, İraq Ədəbiyyatçılar və Yazıçılar Birliyinin Türkmən Mədəniyyət bürosunun sədri, İraq parlamentinin sabiq üzvü Fevzi Əkrəm Terzioğlu AZƏRTAC-ın xüsusi müxbirinin suallarını cavablandırır. Təbii ki, ilk sualım TÜRKSOY-un Telaferli Felekoğlu şəxsiyyətinə və yaradıcılığına göstərdiyi diqqətlə bağlı oldu. Fevzi Əkrəm Terzioğlu isə heç tərəddüd etmədən ölkəmizə və xalqımıza olan sevgisini ifadə etməklə sözə başladı:

-Azərbaycan bizim varlığımızdır. Hər bir İraq türkməni Azərbaycan məhəbbətini qəlbində yaşadır. Bu gün bir daha şahidi olduq ki, tarixi şəxsiyyətlərimizə və ədəbiyyatımıza göstərdiyiniz doğmalıq əbədiyyətə qədər var olacaq. TÜRKSOY-un böyük şairimiz Telaferli Felekoğlunun həyat və yaradıcılığına konfrans təşkil etməsi tarixi bir hadisədir. Təşkilatın aparıcı qüvvəsi kimi Azərbaycanın da bu tədbirin belə möhtəşəm təşkil olunmasında öz yeri, yolu və payı vardır. Bizlərdə Füzulinin, Nəsiminin adını eşidən hər bir türkmən, ilk növbədə, dərhal Azərbaycanı xatırlayır. Azərbaycanla ortaq tariximiz, ədəbiyyatımız və mədəniyyətimiz vardır. Böyük şair T.Felekoğlu da bu ortaq dəyərlərimizdən biridir.

-Nəsimidən söz düşmüşkən, bildiyiniz kimi Prezident İlham Əliyevin Sərəncamı ilə 2019-cu il “Nəsimi ili” kimi qeyd olunub. TÜRKSOY da türk dünyası üçün Nəsimi ili elan edib. Azərbaycanın Birinci vitse-prezidenti Mehriban Əliyevanın təşəbbüsü ilə Nəsiminin anadan olmasının 650 illiyi münasibətilə bir gündə 650 min ağac əkiləcəkdir.

-Nəsiminin tarixi şəxsiyyət və böyük şair kimi dünyada tanıdılmasında Azərbaycanın müstəsna rolu var. Nəsimi insan cəmiyyətinin bütün təbəqələri üçün pak bir simadır. O, laməkan olduğu qədər də saflıq və paklıq nümunəsidir. Azərbaycan bu vaxtadək böyük şairin adının əbədiləşdirilməsi və əsərlərinin nəşri istiqamətində çox böyük işlər görüb. Lakin onun doğumu şərəfinə bir gündə 650 min ağac əkilməsi təşəbbüsü böyük şairin şəxsiyyətinin tərənnümünə verilən ən böyük dəyərdir. Bu nəcib təşəbbüs Nəsimi şəxsiyyətinin əbədiyaşarlığına verilən qiymətdir. İraq türkmənləri, o cümlədən qələm əhli olaraq böyük sevgi ilə bu təşəbbüsə qoşulur və dəstəkləyirik.

-Azərbaycan Mosuldan, Kərkükdən necə görünür?

-Azərbaycan varlığımızın ən vacib parçasıdır. Üçrəngli gözəl bayrağı başımızın üstündə, vətən sevgisi qəlbimizin dərinliyində, Qarabağ problemi mübarizəmizin önündə, Xocalı soyqırımını dərd karvanımızın qarşısında saxlayırıq. Mən bütün sevgimi və məhəbbətimi “Azərbaycan” dastanının sətirlərində tərənnüm etmişəm. İnşallah ki, bu dastanın nəşri İraq türkmənlərinin Azərbaycan sevgisini, sevdasını zirvələrə qaldıracaqdır.

Sabir Şahtaxtı

AZƏRTAC-ın xüsusi müxbiri

Ankara

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.