REGİONLAR
Füzuli rayonunda Şəhidlər Abidə Kompleksi ziyarət olunub
Füzuli, 27 sentyabr, A.Yavərzadə, AZƏRTAC
2020-ci il Azərbaycan xalqının uzunəsrlik tarixinə qızıl hərflərlə yazıldı. Otuz ilə yaxın müddətdə işğal altında olan torpaqlarımız Prezident, Müzəffər Ali Baş Komandan İlham Əliyevin rəhbərliyi ilə şanlı Ordumuzun şücaəti sayəsində azad edildi. Haqq və ədalət uğrunda 44 günlük Vətən müharibəsi möhtəşəm Zəfərimizlə nəticələndi. Tariximizin əbədi qəhrəmanlıq salnaməsi olan bu Zəfər yüzlərlə şəhidimizin qanı ilə yazıldı.
AZƏRTAC-ın bölgə müxbiri xəbər verir ki, 27 sentyabr - Anım Günü ilə əlaqədar olaraq Füzuli rayonunda da tədbir keçirilib. Tədbirdə Füzuli Rayon İcra Hakimiyyətinin başçısı Alı Alıyev, 84 saylı Füzuli seçki dairəsindən Milli Məclisə deputat seçilmiş Vüqar Bayramov, hüquq-mühafizə orqanlarının rəhbərləri, N saylı hərbi hissənin şəxsi heyəti, şəhid ailələri, qazilər və rayon ictimaiyyəti iştirak edib.
Tədbirdə şəhid valideynləri, qazilər və rayon rəsmiləri çıxış edərək 44 günlük zəfər savaşından söhbət açıblar.
Sonra şəhidlərin xatirəsi bir dəqiqəlik sükutla yad olunub.
Torpaqlarımızın azadlığı uğrunda canından keçən şəhidlərimizin adına ucaldılmış Şəhidlər Abidə Kompleksi ziyarət olunub, şəhidlərin ruhuna dualar oxunub, gül dəstələri düzülüb.
Şəhid ailələri və qazilər göstərilən diqqət və qayğıya görə Azərbaycan Respublikasının Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.