REGİONLAR


Gəncə Dövlət Universiteti ilə Mədəniyyət üzrə Elmi-Metodiki və İxtisasartırma Mərkəzi arasında memorandum imzalanıb

Gəncə, 18 aprel, Rauf Hacıyev, AZƏRTAC

Gəncə Dövlət Universiteti (GDU) ilə Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi arasında Uşaq Musiqi və İncəsənət məktəblərində çalışan pedaqoji heyətin hazırlıq səviyyəsinin yüksəldilməsini, mədəniyyət sahəsində tələbələr arasında könüllülük fəaliyyətinin təşviqini, həmçinin birgə əməkdaşlığın əsas istiqamətlərini özündə əks etdirən memorandum imzalanıb.

Tədbirdə GDU-nun professor-müəllim heyəti, ictimai fəal tələbələr və Mədəniyyət üzrə Elmi-Metodiki və İxtisasartırma Mərkəzinin rəhbərliyi iştirak edib.

AZƏRTAC-ın bölgə müxbiri xəbər verir ki, imzalanma mərasimində çıxış edən Gəncə Dövlət Universitetinin rektoru, professor Yusif Yusibov gələcək əməkdaşlığın üstünlüklərindən danışıb.

Bildirilib ki, hazırda respublikamızın qərb bölgəsində ən böyük ali təhsil müəssisəsi olan Gəncə Dövlət Universiteti əsasən yüksəkixtisaslı pedaqoji kadrlar hazırlayan, 80 illik tarixə və zəngin ənənələrə malik elm-təhsil müəssisəsi olmaqla yanaşı, həm də böyük mədəni və intellektual mərkəzdir. Universitetdə keçirilən kütləvi-mədəni tədbirlər, xüsusən tələbələr tərəfindən böyük maraqla qarşılanan könüllü qış və yay məktəbləri, çoxsaylı festivallar, milli və beynəlxalq bayramlar, fləşmoblar, sərgilər, müsabiqələr, təqdimatlar, eləcə də digər maarifləndirici tədbirlər universiteti zəngin ənənəyə malik mədəni mərkəzə çevirib.

Mədəniyyət üzrə Elmi-Metodiki və İxtisasartırma Mərkəzinin direktoru Asif Usubəliyev çıxışında bildirib ki, imzalanacaq memorandum daha çox fəal gənclərin yüksəkixtisaslı, peşəkar kadrlar kimi gələcəkdə mədəniyyət müəssisələrində fəaliyyətinə geniş imkanlar yaradacaq. Qeyd edilib ki, ali məktəblə əməkdaşlığın əsas predmeti Uşaq Musiqi və İncəsənət məktəblərinin müəllimləri üçün müxtəlif təlimlərin təşkili ilə yanaşı, müvafiq tədris proqramlarının hazırlanması və Gəncə Dövlət Universitetinin tələbələri üçün təcrübə keçmələrinin icrasından ibarətdir. Həmçinin gələcəkdə birgə əməkdaşlıq nəticəsində digər layihələrin reallaşdırılacağı da vurğulanıb.

Azərbaycanda mədəniyyətin bütün sahələrinin inkişaf etdirilməsinin hazırda dövlət siyasətinin prioritet istiqamətlərindən olduğunu deyən Elm və innovasiylar üzrə prorektor, Milli Məclisin deputatı Pərvin Kərimzadə bildirib ki, GDU-da bu prosesdə yaxından iştirak edir. Son illərdə Azərbaycanda keçirilən bir çox beynəlxalq mədəni tədbirlərdə və “ASAN xidmət”in gündəlik fəaliyyətində gənclərin könüllü olaraq yaxından iştirak etdiyini deyən Pərvin Kərimzadə ölkəmizdə könüllülük fəaliyyətinin gənclər arasında qısa müddətdə zəngin təcrübəyə malik böyük bir hərəkata çevrildiyini təqdirəlayiq hal kimi dəyərləndirib. Həmçinin universitetdəki digər fəal gənclərin də gələcəkdə könüllülük hərəkatına qoşulacağına və Azərbaycan dövlətinin milli maraqları naminə ümumi işə töhfə verəcəklərinə əminlik ifadə olunub.

Mərkəzin elmi katibi Cavid Əliyev dövlətin idarə olunmasında gənclərin və könüllülük təsisatlarının rolundan, eləcə də tarixən aparıcı qüvvəyə malik gənclərin səmərəli fəaliyyətindən, müasir çağırışlardan bəhs edib.

Könüllülük fəaliyyəti və gənclər mövzusunda təqdimatla çıxış edən Gənc mədəniyyət işçiləri ilə iş şöbəsinin müdiri Ceyhun Əhmədov könüllülük fəaliyyəti, onun mənəvi üstünlükləri, hər bir fərdin bilik və bacarıqlarının, peşəkarlıq və peşə etikasının formalaşmasına könüllülüyün rolu, beynəlxalq təcrübədə könüllülük fəaliyyəti, hazırkı beynəlxalq könüllülük proqramları haqqında ətraflı məlumat verib.

Mərkəzin İnnovativ inkişaf və təbliğat şöbəsinin müdiri Nurəddin Babazadə çıxışında gəncləri mədəniyyət sahəsində könüllülük fəaliyyətinə qoşulmağa dəvət edib. Mədəniyyət sahəsində könüllü olmağın Azərbaycanın tarixi maddi-mədəni irsinin qorunmasına və beynəlxalq aləmdə təbliğinə yönələn fəaliyyət olduğunu deyən Nurəddən Babazadə ölkəmizdə, xüsusən “ASAN xidmət” könüllülərinin fəaliyyətini sosial innovasiyalar sahəsində dünyaya təqdim edilə biləcək ən mükəmməl model olduğunu vurğulayıb.

Çıxışlardan sonra Gəncə Dövlət Universiteti ilə Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi arasında memorandum imzalanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.