CƏMİYYƏT
“Gənclərin məşğulluğu, ömürboyu təhsil və gənclərin əmək bazarına çıxışı” mövzusunda təlim kursu keçirilir
Bakı, 16 aprel, AZƏRTAC
Hazırda dünyada 1,8 milyon nəfər əmək müqaviləsi olmadan işləyir. Avropa İttifaqı ölkələrində qeyri-formal əməklə məşğul olanlar 18,4, ABŞ-da isə 8,6 faiz təşkil edir. Ölkəmizdə isə qeyri-formal şəkildə işləyənlərin sayı bu ilin üç ayında 60 min nəfərə yaxın artıb. Belə hallarla mübarizə aparmaq üçün indi Azərbaycanda qeyri-formal məşğulluqla əlaqədar hökumət komissiyası yaradılıb.
AZƏRTAC xəbər verir ki, Azərbaycan Hökuməti ilə Beynəlxalq Əmək Təşkilatı (BƏT) arasında imzalanmış “2016-2020-ci illər üçün Layiqli Əmək üzrə Ölkə Proqramı” çərçivəsində Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti orqanlarının əməkdaşları üçün “Dövlət Məşğulluq Xidmətinin potensialının gücləndirilməsi” layihəsi çərçivəsində dördüncü təlim kursunun açılış mərasimində bu barədə danışılıb.
“Gənclərin məşğulluğu, ömürboyu təhsil və gənclərin əmək bazarına çıxışı” mövzusuna həsr olunan təlim kursunun açılışında əmək və əhalinin sosial müdafiəsi nazirinin müavini Anar Əliyev Prezident İlham Əliyevin rəhbərliyi ilə ölkəmizdə həyata keçirilən sosial-iqtisadi siyasətin uğurlarından biri kimi, ölkədə məşğulluq imkanlarının artırılmasına, eyni zamanda, gənclərin səmərəli məşğulluğunun təminatına yönələn proqramların ildən-ilə genişləndiyini qeyd edib. O, nazirliyin məşğulluq orqanlarının həyata keçirdiyi aktiv məşğulluq tədbirlərinin əhatə etdiyi vətəndaşların mühüm bir hissəsinin gənclər təşkil etdiyini deyib.
Nazir müavini qeyd edib ki, dövlət başçısının 2018-ci il oktyabrın 30-da imzaladığı Sərəncamla təsdiq edilmiş “2019–2030-cu illər üçün Azərbaycan Respublikasının Məşğulluq Strategiyası”nda gənclərin peşə təhsilindən əmək bazarına inteqrasiyasını gücləndirmək məqsədilə karyera (peşə) - məsləhət və karyera, planlaşdırma xidmətlərinin təkmilləşdirilməsi nəzərdə tutulur. O cümlədən, rəqəmsal texnologiyalardan geniş istifadəyə keçidin təmin edilməsi və mərkəzləşdirilmiş karyera portalının yaradılması hədəflər sırasındadır.
Bu il BƏT-in 100 illik yubileyinin qeyd edildiyini bildirən A.Əliyev çıxışında onu da bildirib ki, beynəlxalq təşkilatla Azərbaycan arasında geniş əməkdaşlıq gündəliyi mövcuddur. “2016-2020-ci illər üçün Layiqli Əmək üzrə Ölkə Proqramı” da birgə layihələrin miqyasını xeyli genişləndirib. Proqram çərçivəsində təşkil olunan növbəti təlim kursu gənclərin əmək bazarına çıxışının, məşğulluğunun dəstəklənməsi sahəsində Dövlət Məşğulluq Xidmətinin əməkdaşlarının bilik və peşəkarlıq səviyyələrinin artırılmasına, onların bu sahədə dünyada olan qabaqcıl təcrübələri öyrənmələrinə dəyərli bir töhfədir.
Azərbaycan Həmkarlar İttifaqları Konfederasiyası sədrinin müavini Cavanşir Alxasov, Azərbaycan Sahibkarlar Konfederasiyasının baş katibinin müavini Fuad Hümbətov, BƏT-in “MDB-də Gənclərin Məşğulluğu üçün Tərəfdaşlıq” layihəsinin rəhbəri Ramiro Pizarro çıxış edərək təlim kursunun əhəmiyyəti barədə danışıblar.
Təlim kursunun gündəliyinə Ramiro Pizarronun “BƏT-in Qlobal komissiyasının əməyin gələcəyi üzrə hesabatına ümumi baxış: “Parlaq gələcək üçün əmək”, Dövlət Məşğulluq Xidmətinin şöbə müdiri İsa Həsənovun “Məşğulluq Xidməti orqanlarının nailiyyətləri və boşluqlara ümumi baxış. Azərbaycan təcrübəsi”, BƏT-in ekspertləri Yuri Qersiyin “Peşəyönümü: doğru peşəyə keçid”, Yens Sibbersenin “Stabil iş yerinə keçid: Gənclərin işə qəbulu və əməkhaqqı subsudiyaları üçün təşviq”, Benqt Lyngbekin “Təhlükəsiz və sağlam iş təcrübələrinə keçid-gənclərin qarşılaşdığı məşğulluq riskləri”, eləcə də Raul Komin və Yuri Qersiyin “Məktəbdən işə keçid: işə əsaslanan öyrənmə imkanlarının artırılması” və digər mövzularda təqdimatların keçirilməsi nəzərdə tutulub.
Təlimlər dörd gün davam edəcək.