CƏMİYYƏT
Gənclərin psixi sağlamlığının qorunması məqsədilə reallaşdırılan “Gənc beyin” layihəsi başa çatıb
Bakı, 20 avqust, AZƏRTAC
Azərbaycan Respublikasının Prezidenti yanında Gənclər Fondunun maliyyə, “ASAN Könüllüləri” təşkilatının təşkilati dəstəyi ilə həyata keçirilən “Gənc beyin” layihəsi başa çatıb.
AZƏRTAC xəbər verir ki, son zamanlar gənclər arasında psixoloji gərginliklərin və özünəqəsd hallarının artması nəzərə alınaraq gənclərimizin psixi sağlamlığının qorunması məqsədilə həyata keçirilən psixoloji təlimlər silsiləsindən ibarət olan “Gənc beyin” layihəsi Qəbələ, Sabirabad, Bərdə və ətraf ərazilərdə yaşayan gəncləri əhatə edib. Layihədə ümumilikdə 200-dək gənc iştirak edib.
Layihə çərçivəsində iştirakçılar "Gənclərin şəxsi inkişafına maneə olan psixoloji amillər" mövzusunda müxtəlif təlimlərdə iştirak ediblər. Mövzu ətrafında interaktiv müzakirələr aparılıb. Həmçinin iştirakçılarla fərdi psixoloji konsultasiya saatları təşkil olunub. Layihə iştirakçıları sertifikatlarla təltif ediliblər.
ASAN könüllüsü Nuray Rüstəmovanın layihə rəhbəri olduğu “Gənc beyin”in əsas məqsədi gənclərin psixi sağlamlığının qorunması, sağlam düşüncə tərzinin aşılanması, psixoloji gərginliyin azaldılması, gənclərdə özünə inam hissinin formalaşdırılması və sağlam düşüncəli gənc nəslin yetişdirilməsinə töhfə verməkdir.