Yevlax, 9 may, AZƏRTAC

İkinci Dünya müharibəsində şərəfli döyüş yolu keçmiş Azərbaycan övladlarının qəhrəmanlığı heç vaxt yaddaşlardan silinməyəcək. Bu qəhrəmanlıq gənc nəsil üçün əsl vətənpərvərlik nümunəsidir.

AZƏRTAC-ın bölgə müxbiri xəbər verir ki, faşizm üzərində qələbənin 76-cı ildönümü respublikamızın bütün bölgələrində olduğu kimi, Yevlaxda da qeyd edilib. Rayon ictimaiyyətinin nümayəndələri, İkinci Dünya müharibəsinin iştirakçıları və Qarabağ müharibəsi veteranları mövcud karantin rejimi qaydalarına uyğun olaraq 1941-1945-ci illər müharibəsi iştirakçılarının xatirəsinə ucaldılmış abidəni ziyarət ediblər.

Veteranlarla görüş zamanı faşizm üzərində qələbənin heç də asanlıqla əldə olunmadığı, bu müharibədə 600 mindən çox azərbaycanlının iştirak etdiyi və onların təxminən yarısının geri qayıtmadığı bildirilib. Diqqətə çatdırılıb ki, 1941-1945-ci illərdə alman faşizminə qalib gələn qəhrəman babaların nəvələri Prezident, Müzəffər Ali Baş Komandan İlham Əliyevin rəhbərliyi altında 44 günlük müharibədə erməni faşistləri üzərində şanlı qələbə qazanaraq, xalqımızın 30 illik həsrətinə son qoydular.

Müharibə veteranları Prezident İlham Əliyevə və Birinci Vitse-prezident Mehriban xanım Əliyevaya onlara göstərdikləri diqqət və qayğıya görə minnətdarlıqlarını bildiriblər.

Sonra İkinci Dünya müharibəsi iştirakçılarına hədiyyələr və təqdim edilib.