İnkişaf və Diplomatiya İnstitutunun birgə tərəfdaşlığı ilə Regional Enerji Təhlükəsizliyi Simpoziumu işə başlayıb
Bakı, 20 sentyabr, AZƏRTAC
ADA Universitetinin İnkişaf və Diplomatiya İnstitutu, ABŞ Hərbi Donanma Qüvvələri Ali Məktəbinin Enerji məsələləri üzrə Akademik Qrupu, NATO Enerji Təhlükəsizliyi Mərkəzi, “BP Azerbaijan” və SOCAR-ın birgə tərəfdaşlığı ilə "Regional enerji təhlükəsizliyi simpoziumu 2022 - Regional əməkdaşlıq: Qafqaz və Mərkəzi Asiya” öz fəaliyyətinə başlayıb.
Bu barədə AZƏRTAC-a ADA Universitetindən məlumat verilib. Bildirilib ki, tədbirdə ADA Universitetinin prorektoru, İnkişaf və Diplomatiya İnstitutunun direktoru Fariz İsmayılzadə, ABŞ Hərbi Dəniz Donanması Ali Məktəbinin nümayəndəsi Brenda Şaffer və həmin Məktəbin Enerji məsələləri üzrə Akademik Qrupunun direktor müavini Alan Hovard açılış nitqi ilə çıxış ediblər.
Daha sonra Azərbaycan Respublikası energetika nazirinin müavini Elnur Sultanov, SOCAR-ın sərmayələr və marketinq üzrə vitse-prezidentinin müavini Vitali Bəylərbəyov və “BP Azerbaijan”nın Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli məruzə ilə çıxış ediblər.
Simpoziumun birinci günündə ABŞ Hərbi Dəniz Donanması Ali Məktəbinin nümayəndələri Alan Hovard və Brenda Şaffer mühazirə ilə çıxış edərək enerji geosiyasəti və təhlükəsizliyi, həmçinin bu istiqamətdə əsas təhdidlər haqqında təqdimatlar ediblər. Bundan əlavə, sözügedən Ali Məktəbin nümayəndəsi Çarlz Cey Linin rəhbərliyi ilə qrup işi aparılıb.
Qeyd edək ki, sentyabrın 19-da başlanan Simpozium 3 gün davam edəcək. Simpoziumda “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov, NATO-nun Enerji Təhlükəsizliyi Mərkəzindən Ceyhun Türe, Türkiyənin energetika və təbii sərvətlər nazirinin müavini Alparslan Bayraktar, SOCAR-ın Sərmayələr və marketinq üzrə vitse-prezidenti Elşad Nəsirov və onun müavini Vitali Bəylərbəyov, habelə ABŞ Hərbi Dəniz Donanması Ali Məktəbinin və SOCAR-ın digər səlahiyyətli nümayəndələri çıxış edəcəklər.
Azərbaycan, Gürcüstan, Türkiyə və Mərkəzi Asiya dövlətlərini təmsil edən rəsmi qurumların yüksək səlahiyyətli əməkdaşlarını bir araya gətirən Simpoziumun əsas məqsədi regional və idarələrarası koordinasiya, eləcə də dövlət-özəl tərəfdaşlığı vasitəsilə regional enerji təhlükəsizliyi barədə məlumatlılığın artırılması və bu istiqamətdə əməkdaşlıqda davamlılığın gücləndirilməsidir.
Bölmənin digər xəbərləri
