ELM VƏ TƏHSİL
İstanbulda fizika, kimya və biologiya fənləri üzrə araşdırma layihələri yarışması keçiriləcəkdir
Bakı, 10 fevral (AZƏRTAC). Azərbaycanın Təhsil Nazirliyindən AZƏRTAC-a bildirmişlər ki, Türkiyənin Bakıdakı səfirliyinin təhsil müşavirliyindən daxil olmuş məlumata əsasən, 2013-cü il mayın 6-dan 10-dək İstanbulda xüsusi MEF məktəblərinin baş müdirliyi tərəfindən fizika, kimya və biologiya fənləri üzrə araşdırma layihələri yarışması keçiriləcəkdir.
Bu yarışmada müxtəlif ölkələrin, o cümlədən Azərbaycanın ümumtəhsil müəssisələrinin yuxarı sinif şagirdləri iştirak edə bilərlər.
Ətraflı məlumat yarışmanın saytında (www.mef.k12.tr) yerləşdirilmişdir. Yarışmaya dair suallarla (0212) 287-69-00 telefon nömrəsinə və ya [email protected] poçtuna müraciət etmək olar.