SİYASƏT
İtaliyalı jurnalist: Dağlıq Qarabağ münaqişəsi Azərbaycan xalqının qanayan yarasıdır VİDEO
Roma, 21 may, AZƏRTAC
İtaliyanın “İl Giornale” qəzetinin saytında Azərbaycana səfəri çərçivəsində cəbhə bölgəsinə baş çəkmiş italiyalı jurnalist Fausto Biloslavonun məqalələri və reportajları yayılıb.
Ermənistan-Azərbaycan, Dağlıq Qarabağ münaqişəsinin reallıqlarını, cəbhə bölgəsindəki vəziyyəti yerindəcə öyrənən jurnalist “Qafqazı qana boyayan unudulmuş müharibə” sərlövhəli məqaləsində bildirir ki, 20 ildən çoxdur davam edən bu müharibə 30 mindən artıq insanın həyatına son qoyub. 1990-cı illərin əvvəllərində başlayan qanlı münaqişədə Azərbaycan tərəfi doğma torpaqları uğrunda mübarizə aparmaqdadır. Jurnalist vurğulayır: “Uzun illərdir “dondurulmuş münaqişə” adlandırılan Dağlıq Qarabağ problemi son aylarda təmas xəttində atəşkəsin tez-tez pozulması ilə gündəmə gəlir”.
Azərbaycan zabitləri ilə söhbət etdiyini deyən Fausto Biloslavo əllərində silahlarla torpaqlarını qoruyan bu hərbçilərin müşayiəti ilə təmas xəttində baş verənləri izlədiyini vurğulayır. Qeyd edir ki, azərbaycanlı hərbçilər torpaqlarını qaytarmağa hər an hazırdırlar. Kapitan İftixar Cəfərov Ermənistan silahlı qüvvələri işğal olunmuş əraziləri tərk etməyənədək bu münaqişənin heç vaxt bitməyəcəyini bildirib.
Məqalədə Müdafiə Nazirliyinin Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudovun fikirləri də yer alıb. O deyib: “Biz münaqişəni sülh yolu ilə həll etmək istəyirik, lakin işğal olunmuş 20 faiz torpaqlarımızı hərbi yolla geri qaytarmağa da hazırıq”. Müəllif yazır ki, Dağlıq Qarabağ Azərbaycan xalqının qanayan yarasıdır.
Məqalədə qeyd edilir ki, çavuş Aqil Quliyev kimi xeyli sayda gənc həlak olmuş qohumlarının xatirəsinə hörmət əlaməti olaraq könüllü olaraq orduya yazılıb. A.Quliyev o dəhşətli günləri belə xatırlayır: “6 yaşımda Xocalıdan qaçarkən ermənilər bizi əsir alaraq babam Ənvəri gözümün qarşısında yandırdılar.”
İtaliyalı jurnalist, həmçinin münaqişə nəticəsində öz doğma yurdlarından didərgin düşmüş azərbaycanlı məcburi köçkünləri dinləmək imkanı əldə edib. 13 yaşında olarkən Ağdamdan məcburi köçkün düşmüş Məhəmməd Aslanov müharibə dəhşətlərini belə təsvir edib: “Bu müharibə bütün gəncliyimi əlimdən alıb. Uşaqlarımın bu faciələri yaşamasını istəmirəm. Bir neçə ay bundan qabaq dünyasını dəyişən anamın arzusu həyat yoldaşının məzarının yanında, ermənilər tərəfindən işğal olunmuş doğma kəndimizdə dəfn edilməsi idi. Anamın bu arzusunu belə yerinə yetirə bilmədim”.
Fausto Biloslavonun “Qafqazda sonu olmayan müharibə” adlı digər məqaləsində 1992-ci ildə Xocalıda ermənilər tərəfindən törədilmiş soyqırımı zamanı körpəni xilas etdiyi zaman çəkilmiş fotonu jurnalistə göstərən məcburi köçkün Oruc Cabbarovun fikirləri yer alıb: “Həmin uşağın anası öldürülüb, çoxlu sayda mülki əhali tikə-tikə doğranıb və başları kəsilib. Kolluqda gizlənən körpə donaraq ölməkdə idi. Torpaqlarımızı əgər sülh yolu ilə qaytarmaq mümkün olmazsa, biz yenidən döyüşməyə hazırıq”.
Yazıda 2014-cü ilin avqustunda ermənilərin snayperdən açdığı atəşlə alnından vurulmuş 19 yaşlı şəhidin qardaşı İsa Əhmədovun müsahibəsi də yer alıb: “Qardaşım üç kilometr aralıda işğal olunmuş kəndlərimizi azad etmək üçün könüllü olaraq hərbi xidmətə gedib. Anam qardaşım vəfat etməmişdən əvvəl ona ehtiyatlı olmasını deyib”. Polkovnik Abdulla Qurbani isə fikirlərini bu sözlərlə ifadə edib: “Torpaq su ilə qarışanda palçıq, qan ilə qarışanda vətən olur”. Təmas xəttində evi olan 28 yaşlı Emin Tanrıverdiyev isə evləri atəş altında olduğundan ailə qurmaq arzusunu reallaşdıra bilmədiyini deyib.
Maqsud Dadaşov
AZƏRTAC-ın xüsusi müxbiri
Roma