Bakı, 1 iyul, AZƏRTAC

Milli Məclisin növbədənkənar iclasında müzakirəyə çıxarılan “Azərbaycan Respublikası İnzibati Xətalar Məcəlləsinə dəyişiklik edilməsi haqqında” qanun layihəsində 211-ci maddə yeni redaksiyada təklif olunmuşdu. Təklifdə qeyd olunurdu ki, tibbi maskadan istifadə etməyənlərə və karantin rejimi qaydalarını pozanlara qarşı cərimələrin məbləği artırılsın. Karantin dövründə qaydaları pozmağa, fərdi qoruyucu vasitələrdən istifadə etməməyə, o cümlədən qapalı məkanlarda və təlimatda nəzərdə tutulan digər yerlərdə maska taxmamağa görə cərimələrin artırılması zərurəti vətəndaş məsuliyyətsizliyinin nəticəsidir.

Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə AZƏRTAC-a açıqlamasında cərimələrin artırılması barədə Milli Məclisin qəbul etdiyi qərarın önəmli olduğunu bildirib. O deyib ki, bu qərarın qəbul edilməsi çox vacib idi. Çünki bəzi insanlar qaydalara əməl etmir, karantin rejimini pozur, qoruyucu vasitələrdən istifadə etmirlər.

Ç.Qənizadə xatırladıb ki, qanun layihəsində İnzibati Xətalar Məcəlləsinin 211-ci maddəsi yeni redaksiyada təklif olunub. Həmin redaksiyaya əsasən, sanitariya-gigiyena və karantin rejimlərinin pozulmasına görə fiziki şəxslər 100 manat, vəzifəli şəxslər 200 manat, hüquqi şəxslər 400 manat cərimə ediləcəklər. Bundan əlavə, həmin əməllərin inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə, fiziki şəxslər 200 manat, vəzifəli şəxslər 400 yüz manat, hüquqi şəxslər 800 manat cərimə olunacaqlar. Buna qədər cərimələr fiziki şəxslərə 50, vəzifəli şəxslərə 100, hüquqi şəxslər üçün isə 200 manat müəyyən edilmişdi.

Cərimələrin məbləğinin qaldırılması, ilk növbədə, vətəndaşların məsuliyyətsizliyinin nəticəsidir. Koronavirus yayılmağa başladığı gündən Nazirlər Kabineti yanında Operativ Qərargahdan və TƏBİB-dən təkrar-təkrar bildirilir ki, infeksiyanın geniş yayılmasının qarşısını almaq üçün qoruyucu vasitələrdən istifadə olunmalı, sosial məsafə saxlanılmalı, gigiyena qaydalarına əməl edilməlidir. Əgər bu qaydalara əməl edilsəydi, karantin rejiminin sərtləşdirilməsinə də ehtiyac olmazdı.

Karantin rejiminin pozulmasına görə cərimələrin ABŞ-da, Türkiyədə, Rusiyada və Gürcüstanda da artırıldığını və bunun müsbət nəticə verdiyini xatırladan Ç.Qənizadə koronavirusla mübarizədə vətəndaş məsuliyyətini artıran cərimə və nəzarət tədbirlərinin gücləndirilməsinin əhəmiyyətli olduğunu bildirib.

Hüquq müdafiəçisi pandemiyanın dünyanın bütün ölkələrini qorxuya saldığını qeyd edib və deyib ki, bu il martın 11-də Ümumdünya Səhiyyə Təşkilatı koronavirusu pandemiya elan edib. Dünyada sürətlə yayılan bu virus indiyə qədər 10 milyon 250 mindən çox şəxsi yoluxdurub. Artıq 504 mindən çox insan dünyasını dəyişib. Azərbaycanda isə indiyə qədər ümumilikdə 18 min nəfərə yaxın koronavirusa yoluxma faktı müəyyən edilib. Onlardan 200 nəfərdən çoxu vəfat edib.

Ç.Qənizadə deyib: “Prezident İlham Əliyev koronavirusun geniş yayılmasının qarşısının alınması üçün ciddi tədbirlərin həyata keçirilməsi istiqamətində qətiyyətli addımlar atdı, mühüm qərarlar qəbul etdi, yoxsa, vəziyyət daha ağır olardı. Belə mühüm tədbirlər sayəsində də Azərbaycan bu gün dünyada daha az itki verən dövlətlərdəndir. Ölkəmizin daha ağır fəsadlarla üzləşməməsi üçün qaydalara əməl etməli, tibbi maskalardan istifadə olunmalı, sosial məsafə saxlanılmalıdır. Prezident İlham Əliyevin bu il iyunun 24-də 1 saylı Gəncə Şəhər Xəstəxanasının modul tipli infeksion xəstəliklər korpusunun açılışında çıxışı zamanı hər birimiz üçün örnək olacaq bir fikri yenidən xatırlatmaq istərdim: “Mən maska ilə gəzirəm... Bütün qapalı yerlərdə maska taxıram. Yaxşı, indi Prezident bunu edirsə, niyə başqası edə bilməz? Nə çətin şeydir bu? Heç bir əziyyət vermir, heç bir problem yaratmır. Sadəcə olaraq, məsuliyyətsizlik və deyə bilərəm ki, eqoizm və biganəlik”.