REGİONLAR
Milli Oftalmologiya Mərkəzinin Avtomobil Səyyar Klinikası Şəkidə humanitar aksiyaya start verib VİDEO
Şəki, 14 dekabr, Mustafa Dadaşov, AZƏRTAC
Akademik Zərifə Əliyeva adına Milli Oftalmologiya Mərkəzinin Avtomobil Səyyar Klinikası dekabrın 14-də Şəkidə növbəti humanitar aksiyaya başlayıb. Aksiya zamanı 300-dək vətəndaşın gözünün müayinə olunması nəzərdə tutulub.
AZƏRTAC-ın bölgə müxbiri xəbər verir ki, iki gün davam edəcək aksiyanın məqsədi Şəki sakinlərinin gözlərini operativ şəkildə müayinə-müalicə etmək, onların səhhətləri ilə bağlı problemlərinin həllinə kömək göstərməkdir. Müayinə əsnasında gözündə ciddi problem aşkarlanan pasiyentlərin Milli Oftalmologiya Mərkəzinə gəlmələrinə şərait yaradılacaq.
Qeyd edək ki, Akademik Zərifə Əliyeva adına Milli Oftalmologiya Mərkəzinin həyata keçirdiyi tədbirlər gündən-günə artır. Bu tədbirlər dövlətimizin başçısının səhiyyə ilə bağlı reallaşdırdığı layihələrin əsas tərkib hissələrindən biri hesab olunur.
Milli Oftalmologiya Mərkəzi tərəfindən regionlarda yaşayan əhaliyə təmənnasız yüksəkixtisaslı oftalmoloji, xüsusilə cərrahi yardım göstərilməsi üçün 2005-ci ildə müasir diaqnostik və cərrahi avadanlıqla təchiz olunmuş Səyyar Klinika təşkil edilib. Həmin vaxtdan Mərkəzin Avtomobil Səyyar Klinikası paytaxtda və respublikanın bir çox şəhər və rayonlarında aksiyalar həyata keçirib.
Azərbaycan səhiyyədə, xüsusilə də oftalmologiya sahəsində bir çox yeniliklərə imza atıb. Akademik Zərifə Əliyeva adına Milli Oftalmologiya Mərkəzinin bütün filialları ən son texnoloji avadanlıqlarla təchiz olunub. Klinikada təcrübəli və xaricdə ixtisas kursları keçmiş həkim-oftalmoloqlar bütün göz xəstəliklərinin müayinə və müalicəsini, eləcə də əməliyyatını həyata keçirirlər. Son illər Mərkəz tərəfindən pasiyentlərə regionlarda səyyar xidmət göstərməsinə xüsusi diqqət yetirilir. 2018-ci ildən Akademik Zərifə Əliyeva adına Milli Oftalmologiya Mərkəzinin Səyyar Qatarı da fəaliyyətə başlayıb.