Naxçıvan, 14 oktyabr, AZƏRTAC

İki əsrdir ki, “böyük Ermənistan” kimi çürük bir ideyanı gerçəkləşdirməyə çalışan ermənilər fürsət tapan kimi Azərbaycan xalqına qarşı terror aktları həyata keçirir, qətliamlar törədirlər. Ötən əsrin 90-cı illərinin əvvəllərindən başlayaraq bu günədək yüzlərlə azərbaycanlı qətlə yetirilib, yaşayış məntəqələri dağıdılıb, mədəniyyət abidələri məhv edilib, əzəli Azərbaycan torpaqları tapdaq altında qalaraq işğal olunub.

AZƏRTAC-ın Naxçıvan bürosuna müsahibəsində bu sözləri deyən “Naxçıvan” Universitetinin rektoru, filologiya üzrə fəlsəfə doktoru, dosent Nurlana Əliyeva bildirib ki, sentyabrın 27-də işğalçılar növbəti dəfə təxribat törədib, bütün cəbhəboyu yaşayış məntəqələrimizi artilleriya qurğularından atəşə tutub. Buna cavab olaraq şanlı ordumuz əks–hücum əməliyyatına başlayıb, düşmənə sarsıdıcı zərbələr endirib, işğal altında qalan bir sıra yaşayış məntəqələrimizi, strateji yüksəklikləri azad edib. İllərdir ki, bu günü gözləyən Azərbaycan xalqı ordumuzun qazandığı uğurlara görə böyük sevinc hissləri keçirir. Azərbaycan Prezidenti, Ali Baş Komandan İlham Əliyevin dediyi kimi: “Biz haqq-ədalət tərəfindəyik. Biz tarixin ən şərəfli anlarını yaşayırıq. Azərbaycan xalqı qədim xalqdır. Bizim tariximizdə bir çox şərəfli anlar olub, hadisələr olub, qələbələr olub. Onların sırasında bugünkü hadisələr xüsusi yerdədir. Biz ədaləti bərpa edirik, ərazi bütövlüyümüzü bərpa edirik, Azərbaycan xalqının ümidlərini doğrulduruq və bundan sonra da doğruldacağıq. Biz haqlıyıq, biz zəfər çalacağıq! Qarabağ bizimdir! Qarabağ Azərbaycandır!”

Nurlana Əliyeva qeyd edib ki, Ermənistan 30 ilə yaxındır işğal siyasətini davam etdirir. Lakin bu müddət ərzində aparılan danışıqlarda erməni tərəfi daim qeyri-konstruktiv mövqedən çıxış edib, danışıqlar prosesini pozmaq üçün əlindən gələni əsirgəməyib. Beynəlxalq ictimaiyyət isə buna biganə yanaşıb. Ona görə də Ermənistan, özlərinin dediyi kimi, “yeni torpaqlar uğrunda yeni müharibəyə” başlamağa qərar verib. Sentyabrın 27-də bu addımı atmaq niyyəti onlara baha başa gəlib və Ermənistan ordusu əks-hücum əməliyyatını həyata keçirən ordumuz qarşısında diz çöküb.

“Cəbhədə tam üstünlüyə malik olan Azərbaycan yenə də humanitar atəşkəsə razı oldu. Lakin ölkəmiz atəşkəs rejiminə əməl etsə də, atəşkəsin ilk günü Ermənistan cəbhə zonasından 70 kilometr aralıda yerləşən, Azərbaycanın ikinci böyük şəhəri olan və əhalinin sıx məskunlaşdığı Gəncə şəhərini gecə saat iki radələrində raket atəşinə tutdu. Ermənistanın hərbi-siyasi rəhbərliyinin tapşırığı ilə həyata keçirilən bu hücum zamanı uşaq, qadın, ahıl insanların da yaşadığı çoxmənzilli binalarda 5-i qadın olmaqla, 10 nəfər həlak oldu, 10-u qadın, 9-u uşaq olmaqla, 34 nəfər yaralandı. 10-dan artıq çoxmənzilli binaya və 100-dən artıq mülki obyektə ziyan dəydi. Ermənistan beynəlxalq hüququn norma və prinsiplərini, 1949-cu il tarixli Cenevrə konvensiyalarını və onların Əlavə protokollarını, habelə 10 oktyabr 2020-ci il tarixdə saat 12:00-dan etibarən elan edilmiş humanitar atəşkəs rejiminin tələblərini kobudcasına pozdu, heçə saydı. Bu, ermənilərin növbəti vandalizm aktı, erməni faşizminin növbəti təzahürüdür”, - deyən rektor diqqətə çatdırıb ki, düşmən Gəncə ilə yanaşı, cəbhə zonasından 100 kilometrdən çox uzaqda yerləşən və 100 mindən artıq əhalisi olan Mingəçevir şəhərini də hədəf alıb, mülki əhalinin sıx yaşadığı məntəqələr raket zərbələri ilə atəşə tutulub. Ermənistanın siyasi-hərbi rəhbərliyinin əsl məqsədi dinc sakinlərlə yanaşı, Cənubi Qafqazın ən böyük istilik elektrik stansiyası olan “Azərbaycan” İstilik Elektrik Stansiyasını, həmçinin “Mingəçevir” Su Elektrik Stansiyasını atəşə tutmaq olub. Raketlərin ordumuzun hərbi hava hücumundan müdafiə qüvvələri tərəfindən zərərsizləşdirilməsi nəticəsində baş verə biləcək regional fəlakətin qarşısı alınıb. Beynəlxalq hüququn norma və prinsiplərini kobud şəkildə pozan, mülki əhalisinin qətlə yetirilməsi və yaralanması ilə nəticələnən terror aktlarını törədən Ermənistanın hərbi-siyasi rəhbərliyi insanlıq əleyhinə yönəlmiş bu cinayətlərini nə vaxtadək davam etdirəcək? Əminik ki, beynəlxalq ictimaiyyət erməni vandalizminə siyasi-hüquqi qiymət verəcək, bu əməlləri törədənlər layiqli cəzalarını alacaqlar. Əgər belə olmasa, inanırıq ki, bu şərəfli missiyanı qüdrətli ordumuz yerinə yetirəcək.

Nurlana Əliyeva vurğulayıb ki, işğalçı Ermənistanın bu terror hərəkətləri bizim mübarizə əzmimizi qıra bilməz. Əksinə, bu cür hadisələr ilə qarşılaşan xalqımızda düşmənə nifrət hissi daha da artır. İnsanlar ordumuzla birlik və həmrəylik nümayiş etdirir, dövlət-ordu-xalq birliyi daha da möhkəmlənir, təcavüzkara layiqli cavabın verilməsi arzusu ürəklərə hakim kəsilir. Biz torpaqlarımıza qayıdacağımız günü səbirsizliklə gözləyirik! Ona görə ki, bizim “Qarabağ Azərbaycandır!” deyən çox güclü, vətənsevər, uzaqgörən, ümummilli liderimiz Heydər Əliyevin yolunu inamla davam etdirən Prezidentimiz var!

Rektor deyib: “Azərbaycan xalqı inanır ki, bayrağımız işğal edilmiş bütün torpaqlarımızda dalğalanacaq, ölkəmizin ərazi bütövlüyü bərpa ediləcəkdir! Xalqımız yaxın günlərdə qələbə sevincini yaşayacaq, məcburi köçkünlər öz yurdlarına qayıdacaqlar. Bu, ya sülh yolu ilə, ya da müharibə yolu ilə olacaq! Qüdrətli ordumuz, sarsılmaz birliyimiz, həmrəyliyimiz bunu qətiyyətlə deməyə imkan verir!”