Naxçıvan, 17 sentyabr, AZƏRTAC

Ötən illər ərzində Heydər Əliyev adına Hərbi Liseyi 3 mindən çox kursant bitirərək müxtəlif ali hərbi məktəblərə daxil olub. Bu il hərbi liseyi bitirən məzunlardan 154 nəfəri Heydər Əliyev adına Azərbaycan Ali Hərbi Məktəbinə, 16 nəfəri Türkiyə Respublikasının, 9 nəfəri Rusiya Federasiyasının, 1 nəfəri isə Cənubi Koreya Respublikasının ali hərbi məktəbinə daxil olub.

Əlahiddə Ümumqoşun Ordunun mətbuat xidmətindən AZƏRTAC-ın Naxçıvan bürosuna bildirilib ki, bu faktlar Heydər Əliyev adına Hərbi Liseydə 15 Sentyabr – “Bilik günü” münasibətilə keçirilən tədbirdə səsləndirilib.

Naxçıvan Qarnizonu qoşunlarında müxtəlif vəzifələrdə xidmət edən Hərbi Liseyin məzunlarının da iştirak etdiyi tədbirdə Əlahiddə Ümumqoşun Ordu komandanı, general-leytenant Kərəm Mustafayev “Bilik günü” münasibətilə zabit, müəllim və kursantları təbrik edərək bildirib ki, 56 kursantla fəaliyyətə başlayan liseydə hazırda 318 kursant təhsil alır. Hərbi liseydə fəaliyyət göstərən pedaqoji kollektivin vətənpərvərliyinin və peşəkarlığının nəticəsidir ki, kursantların təhsilində, tərbiyəsində və intizamında uğurlar qazanılıb.

General-leytenant Kərəm Mustafayev deyib: “Hər birimizi daha da qürurlandıran Heydər Əliyev adına Hərbi Liseyin məzunlarının Ordu sıralarında şərəflə və məsuliyyətlə xidmət etmələridir. İnanırıq ki, Hərbi Liseyin məzunlarından hazırda Naxçıvan Qarnizonu qoşunlarında müxtəlif vəzifələrdə xidmət edən zabitlərin “Bilik günü”ndə iştirak etmələri hər bir kursantı daha da qürurlandıracaq, dərslərdə daha fəal olmağa həvəsləndirəcək”.

Heydər Əliyev adına Hərbi Liseyin müəllimi Təyyubə Bağırova və kursant Tapdıq Abbasov çıxış edərək yaradılan hərtərəfli şəraitə görə dövlətimizə minnətdarlıqlarını bildirib, bundan sonra da dərslərdə fəal olacaqlarına söz veriblər. Valideynlərdən Şəfahət Kətanov Heydər Əliyev adına Hərbi Liseydə təhsil alan gəncləri təbrik edərək, bir valideyn kimi qürurlu olduğunu söyləyib.

Çıxışlardan sonra xidmətdə fərqlənən bir qrup hərbi qulluqçuya medallar təqdim edilib. Sonra orkestrin müşayiəti ilə “Hərbi lisey marşı” ifa edilib, tribuna önündən təntənəli keçid olub.

Qeyd edək ki, hər il Naxçıvan Muxtar Respublikası Ali Məclisi Sədrinin tapşırığı ilə Heydər Əliyev adına Hərbi Liseydə təhsil almağa başlayan kursantların hər birinə tədris vəsaitləri ilə tam komplektləşdirilmiş çantalar hədiyyə edilir. Tədbirdə kursant çantalarına baxış olub. Əlahiddə Ümumqoşun Ordu komandanı, general-leytenant Kərəm Mustafayev pedaqoji kollektivlə görüşüb, keçirilən dərslərlə maraqlanıb.

X X X

Ötən tədris ilini uğurla başa vuran Naxçıvan Qarnizonu tam orta məktəbində də 15 Sentyabr – “Bilik günü” qeyd edilib. Tədbirdə bildirilib ki, 1 nəfərin qızıl, 2 nəfərin gümüş medala, 4 nəfərin isə fərqlənmə attestatına layiq görüldüyü məktəbin 21 məzunundan 19-u ali təhsil müəssisələrinə, 2-si isə orta ixtisas təhsili müəssisələrinə daxil olub. Məzunlardan 5 nəfəri daha yüksək nəticə göstərib. Ötən tədris ilində məktəbin 4 şagirdi Azərbaycan Respublikası məktəblilərinin fənn olimpiadalarının Respublika mərhələsində qalib adını qazanıb.

Çıxışların ardından ötən tədris ilində uğurlu nəticələr göstərmiş müəllim və şagirdlər pul mükafatı, qiymətli hədiyyə və fəxri fərmanla təltif ediliblər.

Qeyd edək ki, bu gün 88 şagirdin ilk dəfə qədəm qoyduğu Naxçıvan Qarnizonu tam orta məktəbində 665 şagird təhsil alır.