CƏMİYYƏT
Qaradağ rayonunda çağırışçı gənclər həqiqi hərbi xidmətə yola salınıb
Bakı, 7 oktyabr, Məhərrəm Əlioğlu, AZƏRTAC
Oktyabrın 7-də Qaradağ rayonundan olan çağırışçı gənclərin həqiqi hərbi xidmətə yola salınması mərasimi keçirilib.
AZƏRTAC xəbər verir ki, Lökbatan qəsəbəsində 1941-1945-ci illər Böyük Vətən və Qarabağ müharibələrində həlak olan rayon sakinlərinin xatirəsinə ucaldılan abidə kompleksinin önündə keçirilən tədbirdə Qaradağ Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin rayon idarəsinin əməkdaşları, ağsaqqallar, müharibə veteranları, valideynlər, çağırışçılar və ictimaiyyətin nümayəndələri iştirak ediblər.
Əvvəlcə tədbir iştirakçıları Heydər Əliyev parkında Ulu Öndərin abidəsi önünə gül dəstələri qoyublar. Sonra Azərbaycanın dövlət himni səsləndirilib.
Tədbirdə çıxış edən Səfərbərlik və Hərbi Xidmətə Çağırış üzrə Dövlət Xidmətinin Qaradağ rayon idarəsinin rəisi , polkovnik-leytenant Novruz Rəhimov həqiqi hərbi xidmətə yollanan çağırışçılara təbriklərini çatdıraraq, Vətənə xidmət etməyin müqəddəs və məsuliyyətli vəzifə olduğunu bildirib. Gənclərə şərəflə xidmət etməyi arzulayan N.Rəhimov bildirib ki, Vətəni qorumaq hər birimizin müqəddəs borcudur. Biz bu borcu şərəf və ləyaqətlə yerinə yetirməyə həmişə hazır olmalıyıq. Siz xoşbəxt gənclərsiniz ki, əsasını ümummilli lider Heydər Əliyevin qoyduğu Orduda xidmət edəcəksiniz. Ordumuz gündən-günə güclənir, onun hərbi qüdrəti daha da artır. Biz bunu aprel döyüşlərində daha aydın gördük.
Qaradağ Rayon İcra Hakimiyyəti başçısının birinci müavini Emil Abbasov müasir müstəqil Azərbaycan dövlətinin memarı və qurucusu ümummilli lider Heydər Əliyevin müdrik rəhbərliyi ilə ölkəmizdə ordu quruculuğu prosesinin sürətlə aparıldığını, qısa müddətdə nizami ordunun yaradıldığını qeyd edib. Bildirib ki, Azərbaycan Prezidenti, Silahlı Qüvvələrin Ali Baş Komandanı İlham Əliyev ordumuzun hərbi qüdrətinin yüksəldilməsinə, maddi-texniki təchizatının gücləndirilməsinə, şəxsi heyətin peşəkarlığının artırılmasına xüsusi önəm verir.
Milli Məclisin deputatı, Yeni Azərbaycan Partiyası Qaradağ rayon təşkilatının sədri Aydın Hüseynov Prezident, Ali Baş Komandan İlham Əliyevin diqqət və qayğısı nəticəsində ordumuzun hərbi qüdrətinin artırılmasından, bunun bariz nümunəsi olaraq düşmənin təxribatlarının qarşısının alınmasında Silahlı Qüvvələrimizin əldə etdiyi uğurlardan danışıb. O, müstəqil Azərbaycanın Ordusunda xidmət etməyin müqəddəs və məsuliyyətli vəzifə olduğunu bildirib, gənclərə şərəflə xidmət etməyi arzulayıb.
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli dövlət müstəqilliyinin qorunmasında, eyni zamanda, gənclərin şəxsiyyət kimi formalaşmasında hərbi xidmətin əhəmiyyətindən söhbət açıb.
Çıxış edən valideynlər övladlarını hərbi xidmətə yola salmaqdan qürur hissi keçirdiklərini söyləyib, çağırışçılara Vətənin keşiyində möhkəm dayanmağı tövsiyə ediblər.
Hərbi xidmətə yola salınan gənclər Azərbaycanın ərazi bütövlüyünü və suverenliyini şərəflə qoruyacaqlarına söz veriblər.
Sonda həqiqi hərbi xidmətə yollanan çağırışçı gənclərə rayon icra hakimiyyəti tərəfindən hədiyyələr təqdim olunub.
Gənclər müqəddəs “Qurani-Kərim”in və Azərbaycan Respublikasının dövlət bayrağının altından keçərək həqiqi hərbi xidmətə yola düşüblər.