REGİONLAR
Qazaxda Gənclər Günü qeyd olunub
Qazax, 1 fevral, Rauf Hacıyev, AZƏRTAC
Gənclər Günü respublikamızın hər yerində olduğu kimi, Qazax rayonunda da böyük təntənə ilə qeyd olunub.
Bu münasibətlə Gənclər Mərkəzində təşkil olunan tədbirdə Qazax Rayon İcra Hakimiyyətinin başçısı Rəcəb Babaşov, aparatın məsul işçiləri, hüquq-mühafizə orqanlarının, idarə, müəssisə, təşkilatların rəhbərləri, təhsil, səhiyyə, mədəniyyət işçiləri, Qarabağ Müharibəsi Əlilləri, Veteranları və Şəhid Ailələri İctimai Birliyinin üzvləri, N saylı hərbi hissənin əsgərləri və rayonda təhsil alan fəal gənclər iştirak ediblər.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ulu öndər Heydər Əliyevin abidəsini ziyarət ediblər.
Qazax şəhər 1 saylı Uşaq Musiqi Məktəbinin xor kollektivinin ifasında Dövlət himni səsləndikdən sonra bayram tədbirinə start verilib.
Tədbirdə çıxış edən Qazax Rayon İcra Hakimiyyətinin başçısı Rəcəb Babaşov 2 fevral - Gənclər Günü münasibətilə bütün Azərbaycan gənclərini, o cümlədən də qazaxlı gəncləri təbrik edib, xoş arzularını çatdırıb.
İcra hakimiyyətinin başçısı qeyd edib ki, ulu öndər Heydər Əliyev Azərbaycan gəncliyini hər sahədə bacarıqlı, güclü görmək istəyirdi. Odur ki, Ümummilli Lider 1994-cü ilin iyulunda Azərbaycanda Gənclər və İdman Nazirliyini yaradıb. 1996-cı il fevralın 2-də isə ilk dəfə müstəqil dövlətimizin gənclər forumu keçirilib. 1997-ci il fevral ayının 1-də Azərbaycan Respublikası Prezidentinin forum nümayəndələrinin bir qrupu ilə görüşündə forumdan keçən 1 il ərzində görülmüş işlər təhlil olunaraq, gəncliklə bağlı əsas problemlərin həlli yolları müəyyən edilib. Ulu öndər Heydər Əliyevin elə həmin gün imzaladığı Sərəncamla fevral ayının 2-si Azərbaycanda Gəncləri Günü elan edilib.
Bildirilib ki, gənclərə, gələcək nəslə diqqət və qayğı ilə yanaşan Prezident İlham Əliyev tərəfindən onların problemlərinin həlli üçün mühüm addımlar atılıb. 2007-ci ilin “Gənclər ili” elan edilməsi, “Azərbaycan Gəncliyi Dövlət Proqramı”nın təsdiqi, 2011-ci ildə Gənclər Fondunun yaradılması, gənclərin sosial müdafiəsi ilə bağlı müxtəlif sərəncamların verilməsi gənc nəslə göstərilən diqqət və qayğının ən bariz nümunəsidir.
Rayon Gənclər və İdman İdarəsinin rəisi Vüqar Nəbiyev çıxış edərək deyib ki, Gənclər Günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. Dünyada yalnız 1999-cu ildə BMT-nin qərarı ilə avqustun 12-si Gənclər Günü elan edilib.
V.Nəbiyev bildirib ki, Qazax rayonunda 2018-ci ildə gənclərlə iş üzrə təsdiqlənmiş tədbirlər planına əsasən 21, ümumilikdə isə 25 tədbir həyata keçirilib. Həmin tədbirlərdə gənclərin bütün təbəqələri təmsil olunmaqla, 3989 gənc iştirak edib. 2018-ci il ərzində bədən tərbiyəsi və idman sahəsi üzrə 34 tədbir həyata keçirilib ki, bu yarışlarda da 2826 nəfərdən çox idmançı öz qüvvəsini sınayıb. Rayon idmançıları tərəfindən beynəlxalq yarışlarda 49, respublika miqyaslı yarışlarda isə 146 medal qazanılıb.
Çıxışlardan sonra bayram tədbiri konsert proqramı ilə davam edib.