Martın 26-da görkəmli iqtisadçı alim, Azərbaycan Milli Elmlər Akademiyasının akademiki, iqtisad elmləri doktoru, əməkdar elm xadimi, professor, “Şöhrət” ordenli Asəf Nadirovun anadan olmasının 75, elmi-ictimai fəaliyyətinin 55 illiyi münasibətilə yubiley mərasimi keçirilmişdir.

AZƏRTAC-ın müxbiri xəbər verir ki, yubiley mərasimini giriş sözü ilə AMEA-nın prezidenti akademik Mahmud Kərimov açmış, Rəyasət Heyəti adından yubilyarı təbrik etmişdir.

AMEA İqtisadiyyat İnstitutunun dırektoru, akademiyanın müxbir üzvü, professor Şahbaz Muradov Asəf Nadirovun keçdiyi həyat yolu və elmi fəaliyyəti haqqında danışmış, qeyd etmişdir ki, onun tədqiqatlarının başlıca istiqamətləri Azərbaycan iqtisadiyyatının kompleks inkişafı yollarının elmi əsaslarını vermək, bundan ötrü mövcud imkanları üzə çıxarıb qiymətləndirməkdən ibarətdir. Respublikanın ümumi sosial-iqtisadi inkişafı ilə onun tarazlı ərazi nisbətlərinin təşəkkülünün qarşılıqlı əlaqəsi ilk dəfə olaraq Asəf Nadirov tərəfindən müəyyən edilmişdir. Təsadüfi deyildir ki, alim regional iqtisad elmimizin banisi sayılır. O, 40 ildən artıq bir müddətdə Azərbaycan elmini beynəlxalq forumlarda ləyaqətlə təmsil etmişdir. A.Nadirovun xidmətləri layiqincə qiymətləndirilmiş, o, müstəqil Azərbaycanın “Şöhrət” ordeni ilə təltif olunmuşdur.

Milli Məclisin iqtisadi siyasət daimi komissiyasının sədri Səttar Səfərov, parlamentin deputatı, AMEA-nın müxbir üzvü Asəf Hacıyev, vergilər nazirinin müavini, iqtisad elmləri doktoru Natiq Qasımov, təhsil nazirinin müavini Elmar Qasımov, AMEA humanitar və ictimai elmlər bölməsinin akademik-katibi Ağamusa Axundov, akademiklər Ziyad Səmədzadə, Fuad Qasımzadə, Budaq Budaqov, İsmayıl İbrahimov, İsa Həbibbəyli, müxtəlif ali məktəblərin, dövlət orqanlarının nümayəndələri yubilyarı təbrik etmiş, ona xoş arzularını bildirmişlər.

Akademik Asəf Nadirov elmi fəaliyyətinə verilən yüksək qiymətə, ünvanına deyilən xoş sözlərə görə minnətdarlığını bildirmişdir.