CƏMİYYƏT


“Rəqəmsallıqla Reallığa” adlı tədbiri keçirilib

Bakı, 19 fevral, AZƏRTAC

Fevralın 19-da Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan Elektron Hökumətin İnkişafı Mərkəzinin təşkilatçılığı ilə “Rəqəmsallıqla Reallığa” adlı tədbir keçirilib.

Tədbirdə dövlət qurumlarının, bank, kredit və sığorta təşkilatlarının rəhbər şəxsləri, beynəlxalq şirkətlərin nümayəndələri və digər qurumların təmsilçiləri iştirak ediblər.

AZƏRTAC xəbər verir ki, Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev çıxış edərək Elektron Hökumətin İnkişafı Mərkəzi tərəfindən həyata keçirilən layihələr, o cümlədən “Rəqəmsallıqla Reallığa” tədbirinin əhəmiyyətindən bəhs edib.

Mərkəz tərəfindən həyata keçirilən “ASAN Finans” layihəsindən danışan Ülvi Mehdiyev onu maliyyə, kredit təşkilatları, sığorta təşkilatları üçün platforma adlandırıb.

Tədbirdə çıxış edən Maliyyə Bazarlarına Nəzarət Palatasının İdarə Heyətinin üzvü vəzifəsini icra edən Asim Zülfüqarov və “Paşa Bank”ın İdarə Heyətinin sədri Taleh Kazımov, “GoldenPay” şirkətinin təsisçisi və müşahidə şurasının üzvü Fərid İsmayılzadə ölkəmizdə maliyyə və bank siyasəti sahəsində, elektron hökumət quruculuğu sahəsində görülən işlərdən danışıblar.

Elektron Hökumətin İnkişafı Mərkəzinin direktoru Fariz Cəfərov mərkəz tərəfindən reallaşdırılan “ASAN Finans” layihəsinin qurumlar üçün yaratdığı üstünlüklərdən bəhs edən təqdimatla çıxış edib. O bildirib ki, Elektron Hökumət İnformasiya Sisteminin alt-sistemi olan “ASAN Finans” sistemi vasitəsilə fərdi sahibkarlar üçün banka getmədən bankın müştərisinə çevrilmək imkanı yaradılıb. Sistemin əsas məqsədi rəqəmsal həllərin maliyyə sahəsinə tətbiqi ilə müştərilərin vaxta, maliyyə qurumlarının isə resurslara qənaət etməsi ilə fasiləsiz və məsafəsiz xidmət göstərilməsini təmin etməkdir.

Mərkəzin direktoru, həmçinin deyib: “Layihə ona inteqrasiya olunmuş təşkilatların yeniliklərinə dəstək verir. Beləliklə də, vətəndaşlar rəqəmsal mühitdə özlərinə aid məlumatları “ASAN Finans” sisteminə inteqrasiya olunmuş təşkilatlara elektron formada yönləndirə bilirlər. “ASAN Finans” layihəsi, eyni zamanda, vətəndaşların müraciətlərinin qurumlar tərəfindən operativ şəkildə təmin olunmasına da öz müsbət təsirini göstərir. Belə ki, mövcud sistemdə qurumlar vətəndaşın icazəsi olduğu təqdirdə “ASAN Finans” sistemi vasitəsilə onun haqqında məlumatları rahatlıqla əldə edə bilir. Bununla da qurumlar vaxta və resurslara qənaət etmiş olur”.

Tədbir sual-cavab sessiyası və müzakirələrlə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.