REGİONLAR


Sumqayıtda “Mənəvi dəyərlərimiz: dünən, bu gün, sabah” mövzusunda tədbir keçirilib

Bakı, 18 sentyabr, AZƏRTAC

Sentyabrın 18-də Mənəvi Dəyərlərin Təbliği Fondunun təşkilatçılığı ilə Sumqayıtda “Mənəvi dəyərlərimiz: dünən, bu gün, sabah” mövzusunda tədbir keçirilib.

Tədbirdə Dini Qurumlarla İş üzrə Dövlət Komitəsinin (DQİDK) sədr müavini Gündüz İsmayılov, Dövlət Komitəsinin Sumqayıt bölgəsi üzrə şöbəsinin əməkdaşları, Mənəvi Dəyərlərin Təbliği Fondunun icraçı direktoru Mehman İsmayılov, Sumqayıt Şəhər İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı Fərman Kazımov, Qafqaz Müsəlmanları İdarəsinin Sumqayıt bölgəsi üzrə qazısı Rauf Sərdarov, Yeni Azərbaycan Partiyası Sumqayıt şəhər təşkilatının üzvləri, məktəb direktorlarının müavinləri, din xadimləri, eləcə də ictimaiyyət nümayəndələri iştirak ediblər.

AZƏRTAC xəbər verir ki, tədbiri açan Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin əməkdaşı Ülvi Məmmədov mövzunun əhəmiyyətindən danışaraq, milli-mənəvi dəyərlərimizin qorunmasının vacibliyindən söz açıb.

DQİDK sədrinin müavini Gündüz İsmayılov mənəvi dəyərlərimizin qorunması və gələcək nəsillərə çatdırılmasının vacibliyinə toxunub, dini dəyərlərimizin mənəvi dəyərlərimiz içərisində özünəməxsus yerinin olduğunu qeyd edib.

Sədr müavini bildirib ki, Aşura mərasimlərində Qafqaz Müsəlmanları İdarəsinin fətvasına, orada qeyd olunan tövsiyələrə əməl edilməlidir. Məhərrəmlik mərasimləri qanun çərçivəsində keçirilməli, zəncir vurmaq, baş yarmaq kimi xalqımızın mədəniyyətinə və dinimizə uyğun olmayan əməllərə yol verilməməlidir.

Mənəvi Dəyərlərin Təbliği Fondunun icraçı direktoru Mehman İsmayılov Fondun fəaliyyəti haqqında qısa məlumat verərək bildirib ki, Prezident İlham Əliyevin 2017-ci il 10 oktyabr tarixli Fərmanı ilə yaradılmış Fond mənəvi dəyərlərin qorunması və inkişafına, bu sahədə sosial layihələrin reallaşdırılmasına dəstək göstərir. Hər bir xalqın varlığını qoruyan əsas amillərdən biri də milli-mənəvi və dini dəyərlərdir və Azərbaycan xalqı da zəngin mənəvi, dini dəyərlərə sahibdir.

Daha sonra çıxış edən Sumqayıt Şəhər İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı Fərman Kazımov gənclərin milli-mənəvi dəyərlərə bağlı ruhda tərbiyə olunmalarının əhəmiyyətinə toxunub. İslam dininin təhsilə verdiyi önəmdən danışan F.Kazımov bildirib ki, məktəblilərin təhsildən yayınaraq Aşura mərasimlərində iştirakı məqbul deyil.

Qafqaz Müsəlmanları İdarəsinin Sumqayıt bölgəsi üzrə qazısı Rauf Sərdarov qeyd edib ki, İslam dini milli-mənəvi dəyərlərimizin tərkib hissəsidir. Diqqətə çatdırılıb ki, əzadarlıq mərasimləri Qafqaz Müsəlmanları İdarəsinin fətvasına uyğun keçirilməlidir. O, həmçinin dövlətin dinə və dindarlara göstərdiyi qayğıdan da danışıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.