Mayın 27-də “Hyatt Regency - Naxçıvan” mehmanxanasında “Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi” layihə sənədinin imzalanma mərasimi keçirilmişdir.

AZƏRTAC-ın müxbiri xəbər verir ki, Azərbaycan Respublikası rabitə və informasiya texnologiyaları naziri Əli Abbasov imzalanacaq sənədin mühümlüyünü vurğulamış, hazırda dünya ictimaiyyəti qarşısında duran əsas problemlərdən birinin informasiya qıtlığı olduğunu söyləmişdir. Bu problemin demokratik və sosial inkişafa mane olduğunu, dünya əhalisinin 97,5 faizinin İnternetə çıxışının yoxluğunu deyən natiq, son vaxtlar Azərbaycanda bu sahədə görülən tədbirlər barədə məlumat verdi.

Təhsil naziri Misir Mərdanov ümumtəhsil orta məktəblərində kompüterləşmə sahəsində mövcud problemlərdən danışaraq dedi ki, hazırda 4500 orta məktəbdən yalnız 1500-də müasir tələblərə cavab verən kompüter var. Məktəblərdə hər 1000 şagirdə 1 kompüter düşdüyünü şöyləyən M.Mərdanov layihəyə görə, respublikanın 122 məktəbinin kompüterlə təchiz olunacağını qeyd etdi. Azərbaycan Prezidenti İlham Əliyevin tapşırığına əsasən məktəblərin kompüterləşdirilməsi üçün 3 illik proqram qəbul olunduğunu deyən nazir, bütün əlaqədar təşkilatlara təşəkkürünü bildirdi.

BMT-nin rezident əlaqələndiricisi Marko Borsotti layihənin Azərbaycan üçün əhəmiyyətini, təmsilçisi olduğu təşkilatın gələcəkdə də belə layihələrdə yaxından iştirak edəcəyini vurğuladı.

Açıq Cəmiyyət İnstitutu - Yardım Fondunun icraçı direktoru Fərda Əsədov 1997-ci ildən bəri görülən işlərdən danışaraq, ölkəmizin informasiya, İnternet sahəsi üçün 2 milyon ABŞ dolları dəyərində avadanlıq alındığını, Bakı, Naxçıvan, Gəncə və Mingəçevir şəhərlərinin İnternet mərkəzlərində 11000 vətəndaşa təlim keçildiyini söylədi.

Sonra layihənin imzalanma mərasimi keçirildi. Layihəni Azərbaycan tərəfdən rabitə və informasiya texnologiyaları naziri Ə.Abbasov, təhsil naziri M.Mərdanov, BMT və Açıq Cəmiyyət İnstitutu - Yardım Fondu tərəfdən müvafiq olaraq M.Borsotti və F.Əsədov imzaladılar.