SİYASƏT
Tacikistan portalı Milli Qurtuluş Günü ilə bağlı məqalə yayımlayıb
Düşənbə, 16 iyun, AZƏRTAC
Tacikistanın “faraj.tj” portalı öz səhifəsində Milli Qurtuluş Günü ilə bağlı tacik dilində məqalə yerləşdirib.
AZƏRTAC xəbər verir ki, məqalədə Milli Qurtuluş Gününün yaranma tarixindən danışılır, bu günün ulu öndər Heydər Əliyevin adı ilə bağlı olduğu qeyd edilir.
Məqalədə bildirilir ki, Azərbaycan 1991-ci il oktyabrın 18-də müstəqilliyini bərpa etsə də, ilk illərdə ölkədə hakimiyyət böhranı yaranmış və Ermənistanın təcavüzü getdikcə güclənirdi. Vurğulanır ki, xalqımızın təkidli tələbi ilə 1993-cü il iyunun 15-də ümummilli lider Heydər Əliyev Azərbaycan Ali Sovetinin sədri, həmin il oktyabrın 11-də isə Azərbaycan Prezidenti seçilib. Beləliklə də Ulu Öndərin siyasi hakimiyyətə qayıdışı tariximizə Milli Qurtuluş Günü kimi daxil olub.
O zaman Heydər Əliyevin qətiyyəti sayəsində ölkədə sabitlik və əmin-amanlıq bərqərar olub. Ulu öndər Heydər Əliyev Azərbaycanı xaosdan xilas edib, ölkə sivil demokratik inkişaf yolu ilə irəliləyərək böyük nailiyyətlər qazanıb. Heydər Əliyev öz gücünə, təcrübəsinə güvənən dahi siyasətçi olub.
Qeyd edilir ki, Ermənistanın Azərbaycan torpaqlarını işğal etməsi nəticəsində bir milyon nəfər qaçqın və məcburi köçkünə çevrilib.
Yazıda Heydər Əliyev hakimiyyətə qayıtdıqdan sonra qısa müddət ərzində ölkədə görülən işlər haqqında da məlumat verilir, neft strategiyası, “Əsrin müqaviləsi” və digər layihələr haqqında söhbət açılır.
Bildirilir ki, Heydər Əliyevin siyasi xəttini davam etdirən Azərbaycan Prezidenti İlham Əliyevin hakimiyyəti dövründə ölkə iqtisadiyyatına 260 milyard dollar sərmayə qoyulub.
Məqalədə 44 günlük Vətən müharibəsi, Azərbaycan ordusunun qələbəsi, torpaqlarımızın azad edilməsi haqqında da danışılır.
Qulu Kəngərli
AZƏRTAC-ın xüsusi müxbiri
Düşənbə