Tanınmış Azərbaycan yazıçısının romanı yenidən nəşr olunmuşdur
Bakı, 16 mart (AZƏRTAC). Tanınmış Azərbaycan yazıçısı İsa Muğannanın “Məhşər” romanı yenidən nəşr olunmuşdur.
“Hədəf” nəşrlərinin mətbuat xidmətindən AZƏRTAC-a bildirmişlər ki, yazıçı ilə bağlanmış müqaviləyə əsasən “XAN” (“Xalqımız, Azərbaycanımız Naminə”) bədii ədəbiyyat layihəsi çərçivəsində nəşr olunmuş bu roman XIV əsrin sonlarındakı Azərbaycanın mənzərəsini əks etdirir.
Əsərdə Əmir Teymurun yürüşləri ərəfəsində Azərbaycandakı mövcud ictimai-siyasi şəraitdən, xalqın azadlıq mübarizəsindən bəhs olunur və Nəsiminin bu mübarizədəki rolu işıqlandırılır. Eyni zamanda, Əmir Teymur ilə Nəsimi və Nəsimi ilə xalq arasındakı maraqlı məqamlara aydınlıq gətirilmişdir. Dövrün bütün bu hadisələrini İsa Muğanna özünəməxsus şəkildə əks etdirmişdir.
Bölmənin digər xəbərləri
