İQTİSADİYYAT


USAID və KOBİA peşəkar assosiasiyalara dəstək üçün yeni təşəbbüslə çıxış edib VİDEO

Bakı, 18 fevral, AZƏRTAC

Fevralın 18-də ABŞ Beynəlxalq İnkişaf Agentliyinin (USAID) Azərbaycandakı missiyası və Kiçik və Orta Biznesin İnkişafi Agentliyi (KOBİA) ölkəmizdə “Biznes və peşəkar assosiasiyalara dəstək” adlı yeni təşəbbüsün başlanması ilə bağlı tərəfdaşlıq sammiti keçirib. Sammitdə yüzdən çox özəl sektor, biznes assosiasiyaları, vətəndaş cəmiyyəti, beynəlxalq təşkilatlar və hökumət nümayəndələri iştirak ediblər.

AZƏRTAC xəbər verir ki, tədbirin açılışında KOBİA-nın idarə heyətinin sədri Orxan Məmmədov, USAID-in Azərbaycandakı missiya direktoru Cey Sinqx və Azərbaycanda Amerika Ticarət Palatasının sədri Nuran Kərimov çıxış ediblər. Sammitdə Azərbaycan, Türkiyə, Özbəkistan və ABŞ-dan olan yerli və beynəlxalq mütəxəssislərin dünyada biznes və peşəkar assosiasiyaların modelləri və onların əhəmiyyəti barədə çıxışları dinlənilib. Həmçinin USAID-in mütəxəssisləri “Biznes və peşəkar assosiasiyalara dəstək” adlı təşəbbüs çərçivəsində USAID ilə əməkdaşlıqda marağı olan yerli tərəfdaşlar üçün növbəti addımlar barədə danışıblar.

USAID-in missiya direktoru C.Sinqx deyib ki, tərəfdaşlıq sammiti əməkdaşlıq mühitində bir neçə ay davam edəcək. Bu, sıx əməkdaşlıq tələb edən bir prosesin başlanğıcıdır: “Bu zaman ərzində USAID müxtəlif qruplar və ya çoxtərəfli konsorsiumların təqdim etdiyi layihə ideyalarını dəyərləndirəcək, onların maliyyələşdirilməsi barədə qərar verəcək. Bu layihə ilə bağlı ümidimiz çoxdur, çünki assosiasiyalar USAID-in göstərdiyi texniki yardımı daha çox kiçik və orta bizneslərə çatdıra bilər ki, bu da təsiri genişləndirəcək”.

KOBIA-nın idarə heyətinin sədri O.Məmmədov isə qeyd edib ki, son vaxtlar müxtəlif sahələrdə təmsil olunan sahibkarların təşkilatlanması istiqamətində dövlət tərəfindən, o cümlədən agentlik tərəfindən təşviqat işləri aparılır. Məlumdur ki, bu prosesdə dövlətin məqsədi biznesin real vəziyyəti barədə düzgün informasiya almaq, özəl sektorun məqsədi isə dövlətin diqqətini öz problemlərinə cəlb etməklə müvafiq sahədə biznes mühitinin münbitləşdirilməsinə nail olmaqdır.

Tədbir müzakirələrlə davam edib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.