REGİONLAR


Ucqar dağ rayonu olan Yardımlıda yeni məktəb binalarının tikintisi geniş vüsət alıb FOTO VİDEO

Yardımlı, 11 sentyabr, İsmayıl Cəfərli, AZƏRTAC 

Yeni dərs ilinə hazırlıq çərçivəsində ümumtəhsil müəssisələrinin tikintisi və təmiri davam etdirilir. Bu proses ölkəmizin bütün bölgələrini əhatə edir. Regionların sosial-iqtisadi inkişafı ilə bağlı Dövlət proqramlarında da məktəb tikintisi əsas yerlərdən birini tutur. Ucqar dağ rayonu olan Yardımlıda da yeni məktəb binaları tikilir, təhsilin maddi-texniki bazası gücləndirilir.

AZƏRTAC xəbər verir ki, son illər Yardımlı rayonunda yeni məktəb binalarının tikintisi və modul tipli məktəblərin quraşdırılması geniş vüsət alıb. Bu il Peştəsər kənd ümumi və Çanaxbulaq kənd tam orta məktəbləri üçün modul tipli binalar quraşdırılıb.

Peştəsər kəndində modul tipli məktəb binası tikilib

Ötən əsrin 70-ci illərində tikilən Peştəsər məktəbi istismar müddətini başa vurmuşdu. Bu isə tədrisin keyfiyyətinə mənfi təsir göstərirdi. Hazırda Peştəsər kənd ümumi orta məktəbi üçün 80 şagird yerlik müasir standartlara cavab verən modul tipli məktəb binası tikilib. Məktəb hər cür zəruri avadanlıqlarla təchiz edilib. Burada 72 şagirdin təlim-tərbiyəsi ilə 14 müəllim məşğul olacaq.

Kənd sakinləri yeni məktəb binasının quraşdırılmasının sevincini yaşayırlar. Onlardan biri də Ədalət Qasımovdur: “Çox sevinirəm ki, bizim dağ rayonunda, Peştəsər kəndində modul tipli məktəb tikilib. Bu, uşaqlarımızın gələcək təhsilinə müsbət təsir göstərəcək. Bu işdə əməyi olan hər kəsə təşəkkür edirəm”.

Peştəsər kənd ümumi orta məktəbinin direktoru Özüxan Bəşirov isə bildirib ki, son illər Prezident İlham Əliyevin təhsilə diqqət və qayğısı nəticəsində rayonlarda yeni məktəb binaları tikilir və ya əsaslı təmir olunur. Peştəsər kəndində tikilən modul tipli məktəb binası da onlardan biridir. O, pedaqoji kollektivin yaradılan şəraitdən səmərəli faydalanacağına, daha səylə çalışacağına, istedadlı gənclər yetişdiricəyinə əminliyini ifadə edib.

Çanaxbulaq məktəbinin direktoru: “Yeni məktəbimizdə dərs keçmək daha rahat olacaq”

Çanaxbulaq kənd tam orta məktəbində də əvvəllər tədris köhnə binada keçirilirdi. Şagirdlərin normal təhsil almalarına əngəl törədən köhnə məktəb yeni modul tipli məktəblə əvəz edilib. Şəhid Azər Məmmədovun adını daşıyan tam orta məktəb 56 şagird yerlikdir. Tədrisin normal təşkili üçün hər cür lazımi inventarlarla təchiz olunan məktəbdə 17 müəllim şagirdlərin təlim-tərbiyəsi ilə məşğul olur.

Məktəbin direktoru Ədalət Ağayev deyib: “Yeni məktəbimiz tikiləndən sonra dərs keçmək daha rahat olacaq. Kombi istilik sistemi də quraşdırılıb. Biz təzə məktəbdə şagirdlərin təlimi ilə daha yaxından məşğul olacağıq və çalışacağıq ki, tədrisimiz daha yaxşı olsun”.

Qaraqaya kəndində 120 şagird yerlik yeni məktəb binası yaxın günlərdə şagirdlərin istifadəsinə veriləcək

Rayonun Qaraqaya kənd tam orta məktəbi üçün tikilən 120 şagird yerlik yeni məktəb binasının inşası isə davam etdirilir. Köhnə məktəb binasının yararsız hala düşməsi, istilik sisteminin olmaması tədrisin keyfiyyətinə də mənfi təsir göstərirdi. Yeni məktəb binasının tikilməsi ilə bu vəziyyətə son qoyulacaq. İkimərtəbəli məktəb binasında tikinti-quraşdırma, konstruksiya işləri başa çatıb. Elektrik, istilik xətləri çəkilib. Binada şagirdlərin yüksək səviyyədə təhsil almaları üçün hərtərəfli şərait yaradılır. Tədris müəssisəsində 17 müəllim şagirdlərin təlim-tərbiyəsi ilə məşğul olacaq.

Qaraqaya kənd tam orta məktəbinin direktoru Sərvər Əliyevlə söhbət zamanı bildirdi ki, məktəb binası yaxın günlərdə şagirdlərin istifadəsinə veriləcək. O, kənd sakinləri adından belə məktəb binasının inşasına görə Prezidentə minnətdarlığını ifadə edib.

Şəhər 4 saylı tam orta məktəb üçün tikilən yeni bina tədrisin təşkilində yaranan çətinlikləri də aradan qaldıracaq

Şəhid Vidadi Nəciyev adına Yardımlı şəhər 4 saylı tam orta məktəbi üçün də 180 yerlik yeni məktəb binası inşa edilir. Ötən əsrin 70-ci illərində istifadəyə verilmiş köhnə məktəb binası istismar müddətini başa vurmuşdu. Tədrisin təşkilində yaranan çətinlik yeni məktəb binasının tikintisi ilə aradan qalxacaq. İnşaat işlərinə avqust ayının əvvəlində başlanılıb.

İş icraçısı Maarif Sultanovun sözlərinə görə, məktəb lazımi şəraitlə təmin ediləcək. Məktəbdə 175 şagirdin təlim-tərbiyəsi ilə 23 müəllim məşğul olacaq.

Üçmərtəbəli yeni tədris müəssisəsinin tikintisi həm kənd sakinlərini, həm də pedaqoji kollektivi çox sevindirir. 4 saylı tam orta məktəbin direktoru Miralim Səlimov deyib: “Yeni məktəb binamız müasir tələblərə cavab verəcək. Burda bütün kabinetlər, elektron avadanlıqlar, informatika sistemləri tamamilə yenidən qurulacaq. Şagirdlərimiz daha müasir avadanlıqlarla təmin olunmuş siniflərdə dərs keçəcək”.

Yardımlı rayonunda yeni tikilən təhsil müəssisələri 2020-2021-ci tədris ilində şagirdlərin istifadəsinə veriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.