Bakı, 13 iyun, AZƏRTAC 

1991-ci il oktyabrın 18-də Azərbaycan XX əsrdə ikinci dəfə dövlət müstəqilliyini elan etdi, azad, suveren bir dövlət olduğunu bütün dünyaya bəyan etdi, xalq qanı, canı bahasına müstəqilliyinə qovuşdu. Müstəqilliyini elan etmiş ölkəmiz çox mürəkkəb tarixi şəraitdə fəaliyyət göstərməyə başladı, müstəqilliyin ilk illərində xalqımız yenidən onu itirmək təhlükəsi ilə üzləşdi. Tarix göstərdi ki, bu yolu keçmək, müstəqilliyi qazanmaq nə qədər məşəqqətlidirsə, onu qoruyub saxlamaq, bu suverenliyi inkişaf etdirmək bir o qədər çətindir. Heç kimə sirr deyil ki, müstəqilliyimizin ilk illəri Azərbaycan xalqı üçün çox ağır dövr olub, çünki həmin dönəmdə dövlətin idarəçilik sükanı arxasında xalqın qüvvələrini bir yerə cəmləşdirə biləcək qüdrətli lider yox idi. Hərc-mərclik, özbaşınalıq, anarxiyanın baş alıb getdiyi Azərbaycanda yeni yaradılmış müstəqil dövlətə liderlik xüsusiyyətlərinə malik olmayan, siyasi hadisələrə qiymət verməyi, gələcəyi görməyi bacarmayan avantürist, populist ruhlu insanlar rəhbərlik edirdi. 1993-cü ilin iyununda bütün bu olaylar kulminasiya həddinə çatdı, anarxiya respublikanı bürüdü. Ərazilərimizin davamlı işğalı, getdikcə gərginləşən siyasi vəziyyət, ictimai həyatın bütün sahələrində hökm sürən xaos, hakimiyyət böhranı, əhalinin günbəgün ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir LİDERƏ ehtiyac olduğunu şərtləndirirdi. Xalq yaxşı anlayırdı ki, yenicə müstəqillik qazanmış ölkəni düşmüş olduğu ağır və dözülməz vəziyyətdən çıxarmağa qadir yeganə şəxsiyyət məhz Heydər Əliyevdir.

Xalqın təkidli tələbi ilə hakimiyyətə qayıdan Heydər Əliyev iyunun 15-də Azərbaycan Ali Sovetinin sədri seçildi. Böyük siyasi təcrübəyə malik bir liderin hakimiyyətə qayıdışı ilə bu təhlükə sovuşdu, Ulu Öndər böyük risklərə baxmayaraq, xalqın qurtuluşu missiyasını cəsarətlə öz üzərinə götürdü, Azərbaycanın dövlət müstəqilliyini təhlükədən qurtardı. Bununla da ölkədə uzun illər davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. Beləliklə, bu mühüm tarixi gün xalqımızın yaddaşına Milli Qurtuluş Günü kimi həkk olundu və 1997-ci ildən etibarən parlamentin qərarı ilə rəsmi bayram kimi qeyd olunur.

Bu fikirləri AZƏRTAC-a müsahibəsində Azərbaycan Memarlıq və İnşaat Universitetinin prorektoru, YAP Yasamal rayonu İdarə Heyətinin üzvü İsrafil Məmmədov deyib.

O bildirib ki, böyük azərbaycanlı, ümummilli liderimiz Heydər Əliyevin hakimiyyətə qayıdışı ilə bütün maneələrə baxmayaraq, ən qısa müddətdə ölkədə ictimai-siyasi sabitlik bərpa olundu, separatçı qüvvələr zərərsizləşdirildi, 1994-1995-ci illərdə dövlət çevrilişi cəhdlərinin qarşısı qətiyyətlə alındı. Bundan sonra isə müstəqil, hüquqi-demokratik dövlət quruculuğuna başlanıldı. Milli qanunvericiliyin Avropa standartlarına uyğunlaşdırılması, cəmiyyətin demokratikləşdirilməsi, insan hüquq və azadlıqlarının qorunması sahəsində səmərəli tədbirlər həyata keçirildi. Ölkəmiz tezliklə vahid Avropa ailəsinə qəbul edildi. Dünyanın tanınmış neft şirkətləri ilə “Əsrin müqaviləsi” və digər kontraktlar imzalandı, bütün sahələrdə islahatlar başlandı, Azərbaycana investisiya axınının əsası qoyuldu. Müstəqil Azərbaycanın yeni Konstitusiyası qəbul edildi, ölkənin ali qanunvericilik orqanına, yerli idarəetmə orqanlarına beynəlxalq müşahidəçilərin iştirakı ilə azad və demokratik seçkilər keçirildi. Bütün türk dünyasının fəxri sayılan Heydər Əliyevin rəhbərliyi ilə respublikamız qədim İpək Yolunun bərpası, Bakı-Tbilisi-Ceyhan, Bakı-Tbilisi-Ərzurum neft və qaz xətlərinin çəkilişi kimi qlobal layihələrin fəal iştirakçısına və təşəbbüskarına çevrildi. Ulu öndərin Azərbaycana rəhbərlik etdiyi dövrdə milli-mənəvi dəyərlərimiz bərpa edildi. Müdrik liderin qətiyyəti xalqa ruh yüksəkliyi gətirdi, apardığı uğurlu daxili və xarici siyasət sayəsində ölkəmiz sivil demokratik inkişaf yolu ilə inamla irəliləyərək böyük nailiyyətlər qazandı.

Aradan ötən illər təsdiqlədi ki, ulu öndərin Milli Qurtuluş fəlsəfəsi sözün geniş mənasında Azərbaycanın mövcudluğunu, onun ən böyük tarixi nailiyyəti olan müstəqilliyini təmin etdi, milli Azərbaycan dövlətçiliyi konsepsiyasını yaratdı. Əlbəttə ki, bunun kökündə Ümummilli Liderimiz tərəfindən müəyyənləşdirilmiş milli birlik və həmrəylik konsepsiyası dayanırdı. Ulu öndər Heydər Əliyevin müəllifi olduğu azərbaycançılıq ideologiyası nəinki azərbaycanlıları, ölkəmizdə yaşayan bütün xalqları, dünyada yaşayan soydaşlarımızı vahid ideya ətrafında birləşdirdi. Azərbaycanın bugünkü uğurları qurtuluş məfkurəsi ilə birbaşa bağlıdır.

“Vətənini, xalqını sevən, həmin çətin, ağrılı günlərin dəhşətlərini yaşayan, şahidi olan, hadisələri gözləri ilə görən insanlar üçün 15 iyun əsl qurtuluş tarixi, Azərbaycan xalqının ölüm-dirim mübarizəsinin tarixidir. Bu tarixi yaradan isə Azərbaycanın inkişafında, müstəqilliyində, gələcəyində müstəsna rol oynayan, daim xalqına arxalanan və xalqına arxa, dayaq olan bir insan - Heydər Əlirza oğlu Əliyevdir”, - deyə İsrafil Məmmədov vurğulayıb.