Bakı, 22 iyul, AZƏRTAC

44 günlük İkinci Qarabağ müharibəsində tarixi Zəfərimiz regionda yeni reallıqlar yaratdı. 2020-ci il 10 noyabr tarixində imzalanmış üçtərəfli Bəyanatda, eyni zamanda, 2021-ci il 11 yanvarda Moskvada üçtərəfli görüş zamanı əldə olunan razılaşmada regionda sülhün, təhlükəsizliyin təminatı üçün vacib olan məsələlər öz əksini tapıb. Azərbaycan istər Vətən müharibəsinin gedişində, istərsə də postmüharibə dövründə təkmil sülh modelini ortaya qoyaraq birgə səylərin göstərilməsi əsasında münasibətlərdə yeni səhifəni açmağın yollarını təqdim edir. Lakin 10 noyabr 2020-ci il Bəyanatından 8 aydan artıq vaxt keçməsinə baxmayaraq işğalçı Ermənistan hələ də sülh razılaşması ilə bağlı irəli sürülən təklifə münasibətini bildirmir, bir az da irəli gedərək belə bir razılaşmanın zamanı olmadığını iddia edir. Ermənistan tərəfi belə sərsəm bəyanatları ilə, həmçinin atəşkəsi pozmaqla, təxribatlar törətməklə Dağlıq Qarabağ münaqişəsinin hələ də davam etməsi barədə görüntü yaratmağa çalışsa da, artıq bunun utopiyadan başqa bir şey olmadığının fərqindədir. Bu günlərdə dövlət başçısı İlham Əliyevin Rusiya Federasiyasının Prezidenti Vladimir Putinin dəvəti ilə Moskvaya işgüzar səfəri zamanı rusiyalı həmkarı ilə keçirdiyi görüşdə Azərbaycanın postmüharibə dövründə regionda sabitliyin, təhlükəsizliyin təminatı istiqamətində səylərinin yüksək dəyərləndirilməsi bu reallığı bir daha təsdiq etdi.

Bu fikirləri AZƏRTAC-a açıqlamasında “İki sahil” qəzetinin baş redaktoru, siyasi elmlər doktoru Vüqar Rəhimzadə bildirib.

Bu səfərin iki dost ölkənin münasibətlərinin hazırkı səviyyəsinə işıq saldığını deyən V.Rəhimzadə qeyd edib: “Azərbaycan özünün ikitərəfli əməkdaşlıq siyasətində daim qonşu ölkələrlə münasibətlərin inkişafına xüsusi diqqət yetirir. Azərbaycan-Rusiya dostluq və əməkdaşlıq münasibətlərinin inkişafı dövlət başçılarının birgə səyi və siyasi iradəsi sayəsində hazırda strateji tərəfdaşlıq səviyyəsinə yüksəlib. Cənab İlham Əliyevin Rusiyaya işgüzar səfəri zamanı Vladimir Putinlə görüşündə də əsas müzakirə mövzusu iki dövlət arasında əməkdaşlığın bundan sonra da genişləndirilməsi oldu. Ümumiyyətlə, son illərdə aydın müşahidə olunur ki, Rusiya Cənubi Qafqaz regionunda yeganə siyasi və iqtisadi güc kimi məhz Azərbaycanı görür”.

“Azərbaycan-Rusiya əlaqələrinin hazırkı yüksək inkişaf səviyyəsini digər amillərlə yanaşı, həm də iki ölkə liderlərinin yaxın dostluq münasibətləri şərtləndirir, - söyləyən baş redaktor bildirib ki, bunu prezidentlər İlham Əliyev və Vladimir Putin dəfələrlə çıxışlarında, müsahibələrində xüsusi qeyd ediblər. Qarşılıqlı səfərlər münasibətlərin daha da gücləndirilməsində, həmçinin əməkdaşlıqda yeni istiqamətlərin müəyyənləşdirilməsində stimulverici amil rolunu oynayır. Bir mühüm məqamı da xüsusi qeyd edək ki, Rusiya Prezidenti tərəfindən Mehriban xanım Əliyevanın iki ölkə arasında münasibətlərin inkişafında və möhkəmlənməsində xidmətlərinə görə “Dostluq” ordeni ilə təltif olunması, eyni zamanda, Azərbaycanın Birinci vitse-prezidentinin bu sahədə səmərəli fəaliyyətinin bariz ifadəsidir.

Ölkələrimizi qədim dostluq və mehriban qonşuluq əlaqələrinin birləşdirdiyini deyən baş redaktor qeyd edib: “Azərbaycan və Rusiya dövlət başçılarının mütəmadi olaraq keçirdikləri görüşlərdə fəal siyasi dialoq özünü qabarıq büruzə verir. Bu görüşlər demək olar bütün sahələrdə münasibətlərin inkişafına təkan verir. Son illərdə Rusiya ilə Azərbaycan arasında iqtisadi-ticari əlaqələrin dərinləşdirilməsi üzrə çox böyük iş görülüb. Artıq onun praktik nəticələri göz önündədir. Azərbaycan və Rusiya prezidentlərinin görüşündə də bu rəqəmlər açıqlandı ki, ilin birinci yarısında əmtəə dövriyyəsi artıb. Bu, çox vacibdir. Çünki keçən il bu istiqamətdə 10 faizdən çox azalma olmuşdu. Nəqliyyat-tranzit əlaqələrində də əməkdaşlıq fəal surətdə genişləndirilir. Şimal-Cənub nəqliyyat dəhlizi üzrə ötən ilin müvafiq dövrü ilə müqayisədə təqribən 20 faiz çox yük daşınıb. Beləliklə, artıq bu dəhliz geniş həcmdə işləyir”.

V.Rəhimzadə bildirib ki, ölkələrimizin bir-birinə bağlanmasında humanitar əlaqələr də xüsusi rol oynayır. Azərbaycanda Rusiya mədəniyyətinə dərin hörmətlə yanaşılır. Bakıda Lomonosov adına Moskva Dövlət Universitetinin və Seçenov adına Birinci Moskva Dövlət Tibb Universitetinin filialları uğurla fəaliyyət göstərir. Sözügedən görüşdə də bu məsələyə xüsusi diqqət yönəldilərək bildirildi ki, bu il Seçenov adına Birinci Moskva Dövlət Tibb Universitetinin filialının birinci buraxılışı oldu. Bu, əlamətdar hadisədir. Zaman sürətlə keçir. MDU-nun və Seçenov adına Birinci Moskva Tibb Universitetinin filiallarında mindən çox tələbə təhsil alır. Rusiyada təhsil alan azərbaycanlı tələbələrin sayı 15 mindən çoxdur. Azərbaycanda isə 16 min tələbə rus dili bölməsində təhsil alır. Beləliklə, Azərbaycan gənclərinin belə bir böyük dəstəsi artıq Rusiya ilə dil, ünsiyyət və təhsil vasitəsilə bağlıdır. Bu fikir xüsusi qeyd edildi ki, təcrübəmizi böyüməkdə olan nəslə əməli surətdə ötürmək çox vacibdir.

“Keçirilən görüşdə də qeyd olunduğu kimi, bugünümüzün əsas məsələsi regionda münaqişədən sonrakı vəziyyətdir”, - söyləyən baş redaktor vurğulayıb ki, dövlətimizin başçısı İlham Əliyev bu məsələni daim diqqətdə saxladığına, çox vacib və həssas məsələlərin həllində şəxsən iştirak etdiyinə görə Rusiya Prezidentinə təşəkkürünü bildirib. Bir daha bəyan edilib ki, Azərbaycan qətiyyətlə münaqişədən sonrakı dövrün maksimum ağrısız keçməsi əzmindədir. Hər iki ölkə başçısı 2020-ci il 10 noyabr tarixli Birgə Bəyanatda nəzərdə tutulmuş məsələlərin icrası ilə bağlı vahid mövqe nümayiş etdirir, bu razılaşmanın, həmçinin bütün kommunikasiyaların, o cümlədən Azərbaycanın əsas hissəsi ilə Naxçıvan MR arasında nəqliyyat dəhlizinin - Zəngəzur dəhlizinin açılmasını vacib sayır. Belə bir şəraitdə Ermənistan tərəfindən Zəngəzur dəhlizinin yaradılması ilə bağlı məsələlərin reallaşdırılmasına süni əngəl törətmək cəhdi yolverilməzdir. 10 noyabr razılaşmasının icrasına əngəl törətmək istəyən kənar qüvvələr də mövcuddur. Onlar regionda sabitliyin, təhlükəsizliyin və sülhün bərqərar olmasında, qarşılıqlı etimad mühitinin yaradılmasında maraqlı deyillər. Bu qüvvələr 30 ilə yaxın dövrdə Ermənistana dəstək göstərib danışıqlar prosesinin uzanmasına səbəb olsalar da sonda hansı nəticə ilə üz-üzə qaldıqlarını anlayır və postmüharibə dövrünün reallıqları ilə barışmamaqla, Dağlıq Qarabağ münaqişəsinin həll olunmadığı barədə işğalçı dövlətin xülyalarına yardımçı olmaqla heç nə əldə edə bilməyəcəklərini çox yaxşı bilirlər. Ermənistan və ona havadarlıq edənlər Azərbaycanın bütün dünyanı heyran edən “dəmir yumruq” əməliyyatını unutmamalıdırlar.

Qlobal güc mərkəzi olan Avropa İttifaqının da Azərbaycanla əlaqələrinin yüksələn xətlə inkişaf etdiyini bildirən Vüqar Rəhimzadə qeyd edib: “Avropa İttifaqı Şurasının Prezidenti Şarl Mişelin ölkəmizə səfəri çərçivəsində dövlət başçısı İlham Əliyevlə birgə mətbuata bəyanatında səsləndirdiyi fikirlər də bunun təsdiqidir. Quruma üzv dövlətlərin üçdəbiri ilə Azərbaycan arasında strateji tərəfdaşlıq haqqında sənədlər və bəyannamələr imzalanmışdır. Avropa İttifaqı həmişə Azərbaycanı etibarlı tərəfdaş kimi qəbul edir, ölkəmizlə əlaqələrin inkişafına dəstək göstərir. Avropa İttifaqı Şurasının Prezidenti Şarl Mişelin təmsil etdiyi qurumun Azərbaycan və Ermənistan arasında sərhədlərin delimitasiyası və demarkasiyası prosesinin, iki ölkə arasında etimad quruculuğu tədbirlərinin başlanmasına dəstək verməyə hazır olduğunu bildirməsi də Ermənistana və onun havadarlarına ciddi mesajdır. Reallıq budur ki, artıq Dağlıq Qarabağ münaqişəsi tarixə qovuşub, yeni səhifənin açılması zamanıdır. Həqiqətən Ermənistan düşdüyü ağır vəziyyətdən xilas olmaq istəyirsə, Azərbaycanın təklif etdiyi sülh sazişini təqdir etməli, bölgədə əməkdaşlığın bərpa olunması ilə bağlı təşəbbüslərə qoşulmalıdır”.

Baş redaktor ümidvar olduğunu bildirib ki, dövlətimizin başçısının Rusiyaya işgüzar səfərinin nəticəsi olaraq Rusiya Ermənistanı sülh razılaşmasına məcbur edəcək, bununla da bölgədə dayanıqlı sülhün təmin olunması imkanları artacaq.