MƏDƏNİYYƏT


Vyanada “Dmitri Şostakoviç və Cövdət Hacıyev: tarixin səhifələri” elmi məruzə axşamı

Vyana, 26 sentyabr, AZƏRTAC

Vyana Musiqi və Təsviri İncəsənət Universitetində “Dmitri Şostakoviç və Cövdət Hacıyev: tarixin səhifələri” elmi məruzə axşamı təşkil olunub. Tədbir C.Hacıyevin 100 illik yubileyinə və D.Şostakoviçin anadan olmasının 111-ci ildönümünə həsr edilib.

AZƏRTAC xəbər verir ki, “Dmitri Şostakoviç və Azərbaycan musiqi mədəniyyəti Şərqlə Qərbin mədəni dixotomiyasının inikası kimi” layihəsi çərçivəsində baş tutan tədbirdə Vyanada fəaliyyət göstərən “Culture Meeting Point” mədəniyyət təşkilatının rəhbəri, incəsənət üzrə fəlsəfə doktoru, musiqişünas Fərəh Tahirova məruzəçi qismində çıxış edib. O, hər iki bəstəkarın həyat və yaradıcılığına nəzər salıb, D.Şostakoviç məktəbi və üslubunun XX əsr klassik musiqi sənətinin inkişafında oynadığı roldan bəhs edib. Bildirilib ki, D.Şostakoviç keçmiş SSRİ məkanında simfonik musiqinin inkişafına xüsusi töhfə verib, Azərbaycan bəstəkarları Qara Qarayev və Cövdət Hacıyev onun məktəbinin yetirmələri olublar. Eləcə də Soltan Hacıbəyov, Mstislav Rostropoviç, Elmira Nəzirova görkəmli bəstəkarın sinfində təhsil alıblar.

D.Şostakoviçin Azərbaycanla əlaqələrinə və burada onun yaradıcılığının araşdırılmasına toxunan məruzəçi dahi bəstəkarın musiqi mədəniyyətimizə böyük önəm verdiyini qeyd edib.

1952-ci ildə Bakıya gəlmiş D.Şostakoviçin Azərbaycan Dövlət Radiosunda çıxışı tədbir iştirakçılarına təqdim olunub. Bildirilib ki, 1934-cü ildə dahi Üzeyir Hacıbəylinin dəvəti ilə ilk dəfə Bakıya səfər edən D.Şostakoviç həyatının sonuna kimi dəfələrlə Azərbaycanda olub və buradakı klassik musiqi yaradıcıları ilə sıx əlaqələr saxlayıb. Azərbaycan dövlətinin görkəmli bəstəkarın bədii irsinə hörmətlə yanaşdığını diqqətə çatdıran F.Tahirova 2006-cı ildə D.Şostakoviçin 100 illik yubileyi münasibətilə Bakıda Beynəlxalq Şostakoviç Festivalının keçirildiyini qeyd edib.

F.Tahirova Azərbaycan simfonik musiqisinin yaradıcılarından biri, tanınmış ictimai xadım və pedaqoq Cövdət Hacıyevin yaradıcılığından söz açaraq, D.Şostakoviçin onun yaradıcılığına göstərdiyi təsirdən danışıb, iki bəstəkarın arasında sıx dostluğu vurğulayıb.

Məruzədə D.Şostakoviçin C.Hacıyev və digər Azərbaycan musiqiçiləri ilə əlaqələri tarixi faktlar, foto, sənədlər və audiofayllar əsasında sənədli xronika kimi təqdim olunub.

Sonra C.Hacıyevin oğlu - musiqişünas İsmayıl Hacıyev atası ilə bağlı xatirələrini, onun yaradıcılıq əlaqələri və Azərbaycan musiqi mədəniyyəti tarixində tutduğu mövqedən bəhs edib.

Tədbirdə C.Hacıyev və D.Şostakoviçin əsərlərindən parçalar səsləndirilib.

Elgün Niftəli

AZƏRTAC-ın xüsusi müxbiri

Vyana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.