REGİONLAR
Xocalı soyqırımı bəşəriyyətə qarşı cinayətdir
Naxçıvan, 25 fevral, AZƏRTAC
Bəşər tarixinin ən amansız və qanlı hadisələrindən sayılan Xocalı soyqırımından 29 il ötür. Bu hadisə mənfur ermənilərin Azərbaycan xalqına qarşı həyata keçirdiyi soyqırımı siyasətinin növbəti mərhələsi idi.
“Naxçıvan” Universitetinin mətbuat xidmətindən AZƏRTAC-ın Naxçıvan bürosuna bildirilib ki, bu fikirlər universitetin Ümumi tarix kafedrasının təşkilatçılığı ilə “Xocalı soyqırımı bəşəriyyətə qarşı cinayətdir” mövzusunda keçirilən elmi konfransda səsləndirilib.
Konfransda əvvəlcə ölkəmizin ərazi bütövlüyünün bərpası uğrunda aparılan döyüşlərdə şəhid olmuş qəhrəman Vətən oğullarının əziz xatirəsi bir dəqiqəlik sükutla yad edilib.
Sonra universitetin rektoru, filologiya üzrə fəlsəfə doktoru, dosent Nurlana Əliyeva çıxış edərək bildirib ki, ümummilli lider Heydər Əliyevin xalqın təkidli tələbi ilə hakimiyyətə qayıdışından sonra Xocalıda törədilən cinayətlər barədə əsl həqiqətlər dünya ictimaiyyətinə çatdırılıb. 1994-cü ildə ulu öndər Heydər Əliyevin təşəbbüsü ilə Azərbaycan Respublikasının Milli Məclisi 26 fevralı “Xocalı Soyqırımı Günü” kimi qəbul edib. 1997-ci il fevral ayının 25-də isə ulu öndər Heydər Əliyevin “Xocalı soyqırımı qurbanlarının xatirəsinə sükut dəqiqəsi elan edilməsi haqqında” Sərəncamı ilə hər il fevralın 26-da Azərbaycan Respublikasının ərazisində Xocalı soyqırımı qurbanlarının xatirəsi bir dəqiqəlik sükutla yad olunur.
Sonra universitetin “Ümumi tarix” kafedrasının professoru Əziz Novruzlu “Xocalı faciəsi tariximizin sağalmayan yarasıdır” mövzusunda çıxışı dinlənilib.
Tədbirdə Azərbaycan Respublikası Silahlı Qüvvələrinin əməkdaşları, Vətən müharibəsi iştirakçıları baş leytenant Ağababa Bədəlovun, baş gizir Ceyhun Hüseynovun, gizir Ceyhun Məmmədovun, müddətdən artıq xidmət edən hərbi qulluqçu İlkin Baxşəliyevin qalib ölkə olan Azərbaycanımızın əsgər və zabitlərinin Vətən müharibəsində göstərdikləri qəhrəmanlıqlardan, şərəfli döyüş yolundan danışıblar.
Daha sonra tələbələrin hazırladığı ədəbi-bədii kompozisiyalar nümayiş olunub.
Sonda tədbirdə iştirak edən Vətən müharibəsi iştirakçılarına ali təhsil ocağının rektoru Nurlana Əliyeva tərəfindən plaket və qiymətli hədiyyələr təqdim edilib.