REGİONLAR
Yevlax rayonunda Tanrıqulular kənd yolu yenidən qurulub VİDEO
Bakı, 27 aprel, AZƏRTAC
Regionların sosial-iqtisadi inkişafına yönəldilən Dövlət Proqramı çərçivəsində vətəndaşların rahat gediş-gəlişinin təmin olunması məqsədilə Azərbaycan Avtomobil Yolları Dövlət Agentliyi tərəfindən Yevlax rayonunda Tanrıqulular kənd yolunun yenidən qurulması işlərinin icrası yekunlaşdırılıb.
Agentliyin İctimaiyyətlə əlaqələr şöbəsindən AZƏRTAC-a bildirilib ki, başlanğıcını respublika əhəmiyyətli Mingəçevir-Bəhrəmtəpə yolunun 6-cı kilometrindən götürən Tanrıqulular avtomobil yolu 5,5 kilometr uzunluğa malikdir. Kənd yolu IV texniki dərəcəyə uyğun yenidən qurulub.
İki hərəkət zolaqlı olan yola 6 metr enində hərəkət hissə və hər bir istiqamət üzrə 2 metr enində çiyinlər daxildir. Uzun illər təmir olunmadan istismar olunan yolda xüsusən payız-qış aylarında istər avtonəqliyyat vasitələrinin, istərsə də vətəndaşların hərəkətində bir sıra problemlər yaşanırdı. Yenidənqurma işləri ilə sadalanan problemlər artıq geridə qalıb.
Tikinti işləri çərçivəsində müxtəlif həcmdə yol yatağının 10 metrə qədər genişləndirilməsi işləri aparılıb, qazma-dolma və kipləşdirmə işləri görülüb, yeni yol yatağı inşa edilib. Layihə çərçivəsində əkin sahələrinin suvarılması üçün ümumilikdə 224 poqonmetr olmaqla, müxtəlif diametrlərdə suötürücü boruların tikintisi, həmçinin mövcud boruların bərpası işləri aparılıb.
Daha sonra “İnşaat Norma və Qaydaları”na əsasən yol əsasının tikintisi və yeni asfalt-beton örtüyünün döşənməsi işləri icra olunub. Ümumilikdə yola 2 qat olmaqla yeni asfalt-beton örtüyü döşənib. Layihəyə uyğun olaraq, zəruri yerlərdə yol nişanı və məlumatverici lövhə, avtobus dayanacaqları quraşdırılıb, yol-cizgi və yolgöstərici xətlərinin çəkilişi işləri aparılaraq yeni və müasir yol infrastrukturu yaradılıb.
Sözügedən yol kəndin girişini, sakinlərin ən çox istifadə etdiyi mərkəzi hissəsini, inzibati idarələr və orta məktəb yerləşən küçələri, həmçinin yeni salınmış yaşayış məhəllələrini əhatə etdiyi üçün aparılmış yenidənqurma işləri 2800 sakinin yaşadığı yaşayış məntəqəsinə qədər rahat gediş-gəlişi təmin edəcək, kənd təsərrüfatının inkişafına müsbət təsir göstərəcək.