İQTİSADİYYAT
Zığ-Suraxanı avtomobil yolunun 5 kilometrlik hissəsi təmir olunur VİDEO
Bakı, 30 iyun, AZƏRTAC
“Azəravtoyol” ASC tərəfindən 11 kilometrlik Zığ-Suraxanı avtomobil yolunun 5 kilometrlik hissəsinin təmir-bərpasına başlanılıb.
ASC-nin mətbuat xidmətindən AZƏRTAC-a bildirilib ki, təmir işləri çərçivəsində sözügedən ərazinin 2,8 kilometrlik hissəsində yol yatağının yararsız qruntu 1-1,5 metr dərinlikdə qazılaraq çıxarılır. Daha sonra karbonat materialı tökülərək yeni yol əsası tikilir. Yol boyu yeraltı kommunikasiya xətləri yeniləri ilə əvəzlənir, bəziləri yolun hərəkət hissəsindən kənara çıxarılır.
Yolun 2,2 kilometrlik hissəsində isə köhnə asfalt-beton örtüyü qaşınaraq ərazidən daşınır, hərəkət hissə asfaltlanması üçün hazır vəziyyətə gətirilir. Ümumilikdə yolun hərəkət hissəsinin 45 min kvadratmetr sahəsinə yeni asfalt-beton örtüyünün döşənməsi nəzərdə tutulub.
Bundan başqa, vətəndaşların avtomobil yolunun kənarı ilə təhlükəsiz hərəkətini təmin etmək məqsədilə yol boyu zəruri olan yerlərdə hər iki istiqamət üzrə 1,5 metr enində yeni piyada səkilərinin tikintisi işləri də aparılacaq. Ümumilikdə yol boyu 6 min poqonmetr yeni səki daşı düzüləcək.
Təmir-tikinti işləri zamanı yolun hərəkət hissəsindən səth sularının ötürülməsi üçün zəruri olan yerlərdə yağış-kanalizasiya sistemi qurulacaq, qrunt sularının ötürülməsi üçün isə drenaj borular qoyulacaq.
Avtonəqliyyat vasitələrinin Zığ-Aeroport yolundan Zığ-Suraxanı yoluna rahat şəkildə daxil olmasını təmin etmək məqsədilə hazırda yeni yol hissəsi də salınır.
Bütün işlər tərtib olunmuş cədvələ uyğun aparılır.