İQTİSADİYYAT


"İdeyadan Biznesə" startap turlarının növbəti mərhələsinə başlanılır

Bakı, 14 sentyabr, AZƏRTAC

Startap hərəkatının genişləndirilməsinə və vətəndaşların innovativ ideyalarının reallaşdırılmasına dəstək məqsədilə Nəqliyyat, Rabitə və Yüksək Texnologiyalar Nazirliyi (NRYTN) Heydər Əliyev Fondunun “Regional İnkişaf” İctimai Birliyi və “Microsoft” şirkəti ilə birgə “İdeyadan Biznesə” layihəsi çərçivəsində Bakı və regionlarda startap turlarının növbəti mərhələsinə start verib.

Azərbaycan Gənclər Fondu, Birləşmiş Millətlər Təşkilatının İnkişaf Proqramı “İdeyadan Biznesə” layihəsinə dəstək verən təşkilatlar sırasına qoşulub.

Layihənin tərəfdaşı isə “Azercell” şirkətidir.

Nazirlikdən AZƏRTAC-a bildirilib ki, startap turlarının budəfəki proqramı olduqca zəngindir. Belə ki, ali təhsil müəssisələrində infosessiyalarla yanaşı, ayrıca startap turları da təşkil olunacaq.

Bakı Dövlət, Azərbaycan Texniki, Azərbaycan Memarlıq və İnşaat, Xəzər, Azərbaycan Dövlət Neft və Sənaye, Bakı Mühəndislik universitetləri və ADA Universitetində startap turları keçiriləcək.

Eyni zamanda, xarici və yerli texnoparkların, inkubasiya mərkəzlərinin nümayəndələrinin iştirakı ilə biznes layihələrinin hazırlanması, müzakirəsi, təqdimatı, eləcə də mentorların dəstəyi ilə startap-komandaların və ideyaların formalaşdırılması üzrə Şəki şəhərində "İdeyadan Biznesə" layihəsi çərçivəsində beynəlxalq İnnovasiya Düşərgəsi (“İnnoCamp”) təşkil olunacaq.

Regionlar üzrə turların, ətraf rayon və şəhərləri də əhatə etməklə, Sumqayıt, Şəki, Gəncə, Bakı şəhərlərində və Naxçıvan Muxtar Respublikasında keçirilməsi nəzərdə tutulur.

Xatırladaq ki, həmin turlar artıq Mingəçevir, Lənkəran və Quba şəhərlərində keçirilib və qaliblər müəyyənləşib.

Startap turu çərçivəsində Nəqliyyat, Rabitə və Yüksək Texnologiyalar Nazirliyinin Yüksək Texnologiyalar Parkı, İnformasiya Texnologiyalarının İnkişafı Dövlət Fondu həmin şəhərlərdə informativ sessiya, interaktiv hissə, müsabiqə və müxtəlif mövzuları əhatə edən təlimlər keçirir.

Tədbirin birinci hissəsində startapları əsas müsabiqəyə hazırlamaq üçün kiçik biznes-treninqlər təşkil olunur, ikinci hissədə isə onlar öz ideyalarını münsiflər heyəti qarşısında təqdim edirlər. Daha sonra seçilmiş layihələr birincilik uğrunda mübarizə aparır. Hər çıxışdan sonra sual-cavab və layihənin müzakirəsi baş tutur. İkinci hissənin sonunda münsiflər hər region üzrə 1-ci, 2-ci və 3-cü yerlərin qaliblərini müəyyənləşdirirlər. Qalib olan layihələr Bakıda keçiriləcək Milli Finalda iştirak hüququ qazanır.

Milli Finalda qalib gələcək 1-ci, 2-ci və 3-cü yerlərin sahibləri təşkilatçılar və tərəfdaşlar tərəfindən mükafatlandırılacaq, eyni zamanda, 24-cü “Bakutel” Beynəlxalq Telekommunikasiya, İnnovasiya və Yüksək Texnologiyalar sərgi-konfransı çərçivəsində layihələrini təqdim etmək imkanı əldə edəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.