Azərbaycan Respublikası Dövlət Neft Şirkəti rəhbərliyinin və YAP Səbail rayon təşkilatının təşəbbüsü ilə respublikanı tam əhatə edən 9 iqtisadi bölgədə səyyar görüş-seminarlar keçirilməsi qərara alınmışdır. İndiyədək bu təşəbbüs Gəncəbasar bölgəsində - Gəncə şəhərində, Şəmkir və Qazax rayonlarında reallaşdırılmışdır. Görüşlərdə Milli Məclisin regional məsələlər daimi komissiyasının sədri Zahid Qaralov, bu yaxınlaradək ARDNŞ birinci vitse-prezidentinin müşaviri işləmiş professor Eldar Şahbazov, şirkətin baş energetiki, YAP yerli təşkilatının sədri Məhəmmədəli Məmmədzadə, AMEA-nın İnsan Hüquqları İnstitutunun direktoru, siyasi elmlər doktoru Rövşən Mustafayev iştirak edirlər. Nümayəndə heyəti bu günlərdə dost və qonşu Gürcüstanın Marneuli rayonunda da olmuş, soydaşlarımızla görüşmüşlər.

Məhəmmədəli Məmmədzadə AZƏRTAC-ın müxbiri ilə söhbətində demişdir: Görüş-seminarları keçirməkdə başlıca məqsədimiz banisi və memarı Prezident Heydər Əliyev olan neft strategiyasının mahiyyətini geniş əhali kütləsinə izah etməkdir. İkincisi, bu strategiyanın əsas icraçılarından biri, Prezidentimizin siyasi xəttinin layiqli davamçısı İlham Əliyevin neft sənayesi sahəsindəki fəaliyyətindən söz açmaqdır. Cənab İlham Əliyev Baş nazir təyin olunana qədər onun siyasi və ictimai fəaliyyətindən kifayət qədər danışılıb, ancaq neft sənayesi sahəsində gördüyü nəhəng işlərdən çoxlarının dolğun məlumatı yoxdur. Keçirdiyimiz görüş-seminarların hamısında yalnız konkret faktlara əsaslanmış, real mövqedən çıxış etmişik. İstinad etdiyimiz faktlar, o cümlədən statistika rəqəmləri dağıdıcı müxalifət liderlərinin, onların himayəsində olan mətbuat vasitələrinin şər və qarayaxma kampaniyasına layiqli cavabımızdır.

İlk növbədə, görüş iştirakçılarına İlham Əliyevin belə bir fikrini çatdırırdıq ki, müasir dünyada neft məqsəd yox, qlobal siyasi, strateji və iqtisadi problemləri həll etmək üçün vasitədir. Onun “Azərbaycanın Xəzər nefti” kitabından götürülmüş bu fikir də maraqla qarşılanır: “Biz Prezidentimiz Heydər Əliyevin müasir neft strategiyasını həyata keçirməklə, yəni, Azərbaycan neftini dünya bazarına çıxarmaqla iqtisadiyyatımızın inkişafını, respublikamızın dünyanın ən aparıcı və qüdrətli ölkələri arasına çıxmasını təmin etmiş olarıq”.

Bütün görüşlərimizi “Azərbaycan nefti XXI əsrdə” devizi altında keçiririk. Bölgələrə səfərimiz zamanı yəqin etmişik ki, əhalinin neft strategiyasına marağı çox böyükdür. Təəssüf ki, dinləyicilərimizin məlumatsızlığının da şahidi olduq. Yeri gəlmişkən, bu boşluğun doldurulmasında jurnalistlərimizin də üzərinə böyük vəzifə düşür. Başlıca sual neft strategiyasının tərkib hissəsi barədə idi. Bu suala cavab verməzdən əvvəl xüsusi vurğulayırdıq ki, banisi və memarı möhtərəm Prezidentimiz Heydər Əliyev olan Azərbaycanın neft strategiyası onun beynəlxalq aləmdə etibarlı və sistemli davamçısı İlham Əliyev tərəfindən elmi surətdə əsaslandırılmışdır. Sonra isə tərkib hissələr sadalanırdı: Azərbaycanın milli maraqlarını əsas tutaraq dünyada ən iri və məşhur transmilli neft şirkətləri ilə beynəlxalq neft müqavilələrinin imzalanması; neft və qaz yataqlarının geoloji və geofiziki qiymətləndirilməsindən tutmuş nəhəng terminalların tikintisinədək qısa bir müddətdə regionda neft və qaz infrastrukturunun yaradılması; Xəzər hövzəsindən Qara dənizə və Aralıq dənizinə neft və qazın ixracını təmin edən boru kəmərlərinin layihələndirilməsi, tikintisi və bununla əlaqədar coğrafi-strateji, siyasi və iqtisadi problemlərin həlli.

Natiqlərimizin çıxışlarında, suallara cavablarında dinləyicilərin diqqətinə xüsusi olaraq çatdırılırdı ki, bağlanmış müqavilələr üzrə qarşıdakı iki il müddətində Azərbaycana 15 milyard ABŞ dolları məbləğində sərmayə qoyulması nəzərdə tutulur. Bakı-Tbilisi-Ceyhan neft kəmərinin əhəmiyyəti ondan ibarətdir ki, bu qurğu ilk dəfə olaraq Xəzər və Aralıq dənizləri arasında iqtisadi körpü salır və dünya miqyasında neftin satış mexanizminə təsiretmə imkanı yaradır. Görülmüş işlərdən əldə edilən gəlir respublikamızın Neft Fonduna köçürülür. Bu vəsaitin haraya xərclənməsi isə əhaliyə yaxşı məlumdur. Salınan qaçqın şəhərcikləri barədə ölkəmizin hər bir sakininin məlumatı vardır. Bundan əlavə, Fondun rəhbərliyi ildə dörd dəfə hesabat verir.

Görüşlərimiz zamanı rayonlarda İlham Əliyevin siyasi lider kimi qəbul edilməsinin, onun Baş nazir təyin edilməsinin alqışlandığının şahidi olurduq. Məruzəçilərimiz əhalinin bu qənaətini daha da möhkəmləndirmək üçün beynəlxalq aləmdə söz sahibi olan siyasətçilərin və ictimai xadimlərin fikirlərinə istinad edirdilər. Məsələn, görüşlərdən birində Vaşinqtondakı Con Hopkins Universitetinin məşhur alimi Fred Starın bu sözləri səsləndi: “Azərbaycan Mərkəzi Asiya və Qafqazda böyük potensiala malik bir ölkədir. Bu ölkədə mədəniyyət, dövlətçilik və ictimai münasibətlər demokratik prinsiplərlə uzlaşır. Bu gənc dövlətin özünəməxsus çətinlikləri var. Həmin çətinlikləri aradan qaldırmaq üçün məhz İlham Əliyev kimi gənc liderlər dövlətin inkişafı üçün çox lazımdır”.

Görüş-seminarlar davam edir. Növbəti səfər Naxçıvan Muxtar Respublikasınadır.