ABŞ DÖVLƏT DEPARTAMENTİ AZƏRBAYCAN VƏ ERMƏNİSTAN PREZİDENTLƏRİNİN SƏDƏRƏK GÖRÜŞÜNÜ BƏYƏNİR
“ABŞ Dövlət Departamenti Azərbaycan və Ermənistan prezidentlərinin Naxçıvan Muxtar Respublikasının Sədərək rayonunda keçirilmiş görüşünü bəyənir və hesab edir ki, münaqişənin həlli üçün prezidentlərin vaxtaşırı görüşləri zəruridir”. ATƏT-in Minsk qrupuna həmsədrlik edən Birləşmiş Ştatların Prezident Heydər Əliyev ilə Prezident Robert Koçaryan arasında avqustun 14-də keçirilmiş görüşə rəsmi münasibəti belə olmuşdur.
ABŞ Dövlət Departamentinin rəsmi nümayəndəsi Mark Toner bildirmişdir ki, ATƏT-in Minsk qrupuna həmsədrlik edən ölkələr Azərbaycan və Ermənistan prezidentlərinin Sədərək görüşündə iştirak etməsələr də hadisələrin inkişafından xəbərdardırlar. O demişdir ki, ABŞ Minsk qrupuna həmsədrlik edən digər ölkələrlə birlikdə münaqişənin sülh yolu ilə nizamlanması istiqamətində səylərini davam etdirəcəkdir.
Analitiklər bu görüşün “evdə” keçirilməsini müsbət hal kimi qiymətləndirirlər. Harvard Universitetinin Xəzər Araşdırmaları Proqramının tədqiqatçısı Brenda Şaffer 9 ay fasilədən sonra keçirilən bu görüşün çox əhəmiyyətli olduğunu bildirərək demişdir: “hər iki prezident uzun müddətdən bəri Minsk qrupunun işi ilə razı qalmadığını bildirirdilər. Son görüş həmsədrlər tərəfindən deyil, prezidentlərin şəxsi təşəbbüsündən yaranıb və bunun haradasa başqa bir yerdə deyil, məhz əhalisi daha çox sülh istəyən torpaqda keçirilməsi xüsusi əhəmiyyət daşıyır”.
Brenda Şaffer daha sonra demişdir ki, prezidentlərin mövqeyi bir-birindən uzaq deyildir. Üç dəfə sülhə yaxınlaşma müşahidə olunmuşdur, lakin hər dəfə bu, Yerevanda baş vermiş hadisələr üzündən - ya terror aktları, ya siyasi dəstəyin azlığı və ya iqtidarın dəyişməsi üzündən alınmamışdır.
Harvard Universitetinin tədqiqatçısı hər iki ölkədə 2003-cü ildə keçiriləcək prezident seçkilərini əsas gətirərək danışıqlarda müəyyən nailiyyətlər əldə olunacağına inandığını bildirmişdir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
