ABŞ HÖKUMƏTİ ASTARADA SUVARMA SİSTEMİNİN BƏRPASI LAYİHƏSİNİ MALİYYƏLƏŞDİRMİŞDİR
AZƏRTAC xəbər verir ki, ABŞ-ın Beynəlxalq İnkişaf Agentliyi ölkəmizdə həyata keçirdiyi «İcma inkişafı fəaliyyəti proqramı» çərçivəsində Astara rayonunun Təzəkənd ərazisində suvarma sisteminin bərpası layihəsini maliyyələşdirmişdir.
Kənd icma şurası ABŞ-ın qeyri-hökumət təşkilatı olan «CHF İnternational» ilə birlikdə Təzəkənd və Ojakəran kəndlərinin ərazisində 5 kilometr ərazidə sitrus və subtropik meyvə bağlarının suvarılması üçün nəzərdə tutulan boru xətlərini və 200 tonluq su anbarını təmir etmiş, Pensər çayının sahilində su nasosu quraşdırmışdır.
Ərazidə suvarma sisteminin bərpası nəticəsində 200 hektar sitrus və subtropik meyvə bağlarının suvarılması təmin ediləcəkdir.
Layihənin icrasına 20 min 338 manat vəsait sərf olunmuşdur ki, bunun da 15 min 40 manatı ABŞ hökuməti tərəfindən maliyyələşdirilmişdir.
İyunun 11-də layihənin icrası ilə bağlı keçirilən mərasimdə kənd icma şurasının üzvləri, ABŞ-ın «CHF İnternational» təşkilatının məsul işçiləri, kənd ağsaqqalları və ictimaiyyətin nümayəndələri çıxış edərək, yerli əhəmiyyətli sosial məsələlərin həllinə göstərdiyi dəstəyə görə ABŞ hökumətinə minnətdarlıqlarını bildirmişlər.
Bölmənin digər xəbərləri
