ALİ TƏHSİL MÜƏSSİSƏLƏRİNİN MAGİSTRATURA PİLLƏSİNƏ “ELEKTRON ƏRİZƏ” QƏBULU DAVAM EDİR
Tələbə Qəbulu üzrə Dövlət Komissiyasından (TQDK) AZƏRTAC-a bildirmişlər ki, iyunun 5-dən 2008-2009-cu tədris ili üçün ali məktəblərin magistratura pilləsinə “Elektron ərizə” qəbulu başlanmışdır.
Sənədlərin qəbulu internet vasitəsi ilə aşağıdakı qaydada aparılır:
Bakalavr şəxsiyyət vəsiqəsindən (nömrəsindən və PİN kodundan) və “TQDK-nın ödəmə kartı”ndan (iş nömrəsi və şifrindən) istifadə etməklə TQDK-nın müvafiq internet səhifəsinə (tqdk.gov.az/erizemagistr) daxil olur və oradakı “Bakalavrın elektron ərizəsi”ni doldurur (“TQDK-nın ödəmə kartı”nı poçt şöbələrindən əldə etmək olar).
Sonra bakalavr iyunun 5-dən 14-dək hər gün (bazar günü istisna olmaqla) saat 9-dan 17-dək TQDK tərəfindən respublikanın magistratura pilləsinə qəbul aparılan ali məktəblərində və TQDK-da yaradılmış sənəd qəbulu komissiyalarına (SQK) sənədləri təqdim edib “Bakalavrın elektron ərizəsi”ni təsdiq etdirir.
Bu il respublikanın 34 ali məktəbinin magistr pilləsinə qəbul aparılır. Həmin təhsil müəssisələrindən 25-i dövlət, 9-u isə özəl ali məktəblərdir.
Ümumi qəbul planı 4 min 809 yerdən ibarətdir. Azərbaycan bölməsi üzrə 3 min 482, rus bölməsi üzrə 636, birgə müsabiqə aparılan ixtisaslar üzrə 691 yer ayrılmışdır.
Türkiyə universitetlərinin magistratura pilləsində təhsil almaq üçün 20 yer ayrılmışdır. Bu yerlər kompyuter mühəndisliyi, ekologiya, turizmdə idarəetmə və otelçilik, mühasibat uçotu və audit, maliyyə və kredit, bank işi, biznesin təşkili və idarə edilməsi, menecment (idarəetmə), təhsilin təşkili və idarə olunması, beynəlxalq münasibətlər ixtisasları üzrədir.
Plan yerlərinin 4 min 337-si dövlət ali məktəblərinə, 472-si isə özəl ali məktəblərə aiddir.
Cari ildə bakalavrlar 68 proqram üzrə imtahan verəcəklər. Həmin proqramlar TQDK tərəfindən bu ilin fevral ayında “Magistr 1” jurnalında dərc edilmişdir.
Bölmənin digər xəbərləri
