ELM VƏ TƏHSİL
AMEA-nın Fizika İnstitutu maddi-texniki bazasını gücləndirir
Bakı, 6 avqust (AZƏRTAC). Azərbaycan Milli Elmlər Akademiyası (AMEA) Fizika İnstitutu maddi-texniki bazasını gücləndirir.
AMEA-nın ictimaiyyətlə əlaqələr şöbəsindən AZƏRTAC-a bildirmişlər ki, bu, Azərbaycan Respublikasının Prezidenti yanında Elmin İnkişafı Fondu tərəfindən qrant mükafatı almış layihə çərçivəsində həyata keçirilir. İnstitutun sektor rəhbəri, fizika-riyaziyyat elmləri doktoru, professor Emil Hüseynovun məlumatına görə, instituta Yaponiyadan ultrabənövşəyi görünən işıq və infraqırmızı diapazonda işləyən ellipsometrik spektrometr sistemi, nanoölçülü kristalların optik xüsusiyyətlərini öyrənmək üçün atom qüvvə mikroskopu, Almaniyadan rentgen sistemləri və ABŞ-dan günəş elementlərini xarakterizə edən qurğu alınmışdır. Bu cihazlar fizika elmində nanoölçülü tədqiqatlar üçün nadir elmi-texniki avadanlıqdır.