ANKARADA AZƏRBAYCANLI MƏZUNLARIN BURAXILIŞ MƏRASİMİ OLMUŞDUR
AZƏRTAC-ın xüsusi müxbiri xəbər verir ki, Türkiyə paytaxtındakı Heydər Əliyev Parkında bu dərs ilində qardaş ölkənin müxtəlif universitetlərini bitirmiş 200-ə yaxın azərbaycanlı gəncin buraxılış mərasimi keçirilmişdir.
Mərasim iştirakçıları əvvəlcə ulu öndərin xatirəsini ehtiramla yad etmiş, müraciət səsləndirmişlər.
Azərbaycanın Ankaradakı səfirliyində təşkil edilən tədbirdə isə Türkiyə Prezidentinin köməkçisi Hüseyn Avni Karslıoğlu, ölkənin Təhsil Nazirliyi və ali təhsil qurumunun rəhbərləri, nüfuzlu universitetlərin professorları iştirak etmişlər. Səfir Zakir Həşimov məzunları təbrik edərək, onlara ölkəmizin daha da çiçəklənməsi yolundakı fəaliyyətlərində uğurlar arzulamışdır. Təhsil attaşesi Nəcibə Nəsibova tədbirin iştirakçılarına Azərbaycanın təhsil naziri Misir Mərdanovun təbrik məktubunu çatdırmışdır.
İstanbul Universitetinin məzunu Aytəkin Mustafayeva Türkiyədə təhsil almaq üçün yaradılmış şəraitə görə Azərbaycan və Türkiyə dövlətlərinə, eləcə də universitet müəllimlərinə bütün məzunlar adından minnətdarlığını bildirmişdir.
İstanbul Texniki Universitetinin təyyarə və kosmik elmlər fakültəsini təhsil ocağının tarixində ən yüksək balla bitirmiş ilk məzun Teymur Sadıqova xüsusi xatirə hədiyyəsi təqdim edilmişdir.
Azərbaycanlı məzunlar ölkənin Prezidenti İlham Əliyevin çağırışına uyğun olaraq, təhsillərini başa çatdırdıqdan sonra fəaliyyətlərini Azərbaycanda davam etdirəcəklərini bildirmişlər.
Azərbaycan Mədəniyyət və Həmrəylik Dərnəyinin dəstəyi ilə keçirilən buraxılış tədbirləri məzunlar üçün təşkil olunmuş ziyafətlə davam etmişdir.
Müğənni Rəşad İlyasovun ifası və milli rəqslərimiz məzunlarımızın həyatındakı bu əlamətdar gündə onlara unudulmaz anlar bəxş etmişdir.
Bölmənin digər xəbərləri
