ARDNŞ ABŞERONUN EKOLOJİ BƏRPASI LAYİHƏSİNİ HƏYATA KEÇİRƏCƏKDİR
AZƏRTAC xəbər verir ki, “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks Tədbirlər Planı”na əsasən Dövlət Neft Şirkətinin (DNŞ) fəaliyyət zonalarına daxil olan yataqların istismarı nəticəsində çirklənmiş torpaqların rekultivasiyası, mədən ərazilərində ümumi landşaft-arxitektura planına uyğun mərhələli reabilitasiyası işlərinin həyata keçirilməsi üzrə icraçı orqan müəyyən edilmişdir.
Həmin tədbirlər planı çərçivəsində DNŞ Abşeronun ekoloji bərpası layihəsini həyata keçirməyi planlaşdırır. Layihənin həyata keçirilməsi zamanı Abşeron yarımadasının neft tullantılarından təmizlənməsi, bu tullantıların atılmasının qarşısının alınması, ümumilikdə torpaqların reabilitasiyası, xüsusi təmizləyici qurğularla yuyularaq insan sağlamlığı üçün potensial təhlükəli olan neft və mazut qalıqlarından təmizlənməsi nəzərdə tutulmuşdur.
Dünya Bankı ilə aparılmış danışıqlar zamanı layihənin qiymətləndirmə sənədi və razılaşma protokolu imzalanmış, layihənin ümumi dəyəri müəyyənləşdirilmişdir. Kreditin alınması üçün müvafiq sənədlər toplusu Dünya Bankına təqdim edilmişdir. Layihə ilə nəzərdə tutulan yüksək səmərəli stasionar və yarımmobil təmizləmə texnologiyalarının tətbiq edilməsi məqsədilə satınalma prosedurlarının keçirilməsi üçün müvafiq tədbirlər görülür.
Bölmənin digər xəbərləri
