AŞIQ ŞƏMŞİRİN YUBİLEYİNƏ HƏSR OLUNMUŞ BEYNƏLXALQ KONFRANS ÖZ İŞİNƏ BAŞLAMIŞDIR
Azərbaycan Milli Elmlər Akademiyası Folklor İnstitutunun təşkilatçılığı ilə keçirilən tədbirin açılış mərasimində institutun direktoru Hüseyn İsmayılov və filologiya elmləri doktoru, professor İsmayıl Vəliyev çıxış edərək, konfransa uğurlar arzuladılar.
Aşıq Şəmşirin 110 illik yubileyinin keçirilməsi haqqında Azərbaycan Respublikası Prezidentinin Sərəncamını ümummilli liderimiz Heydər Əliyevin aşıq sənətinə, onun nümayəndələrinə diqqət və qayğısının, xalqımızın mənəvi keçmişinə hörmət və ehtiramının ifadəsi kimi yüksək qiymətləndirən natiqlər qədim aşıq sənətimizin davam etdirilməsində və zənginləşdirilməsində Aşıq Şəmşirin əvəzsiz xidmətlərindən söz açdılar.
Oeyd edildi ki, ömrünün mənasını öz sənəti ilə xalqa xidmətdə görən Dədə Şəmşir aşıq şerinin müxtəlif formalarında gözəl sənət nümunələri yaratmış, fikir və duyğularını yüksək sənətkarlıqla ifadə etmişdir. Bu böyük el şairinin şerləri ona görə qüdrətlidir ki, onun yaradıcılığı xalqımızın milli-mənəvi dəyərlərini tərənnüm edən zəngin saz və söz xəzinəsindən, klassik sənətkarlarımızın bədii irsindən qaynaqlanır.
Azərbaycan tarixinin, türk tarixinin, türk mifologiyasının öyrənilməsi baxımından konfransın əhəmiyyətini xüsusi vurğulayan natiqlər gələcəkdə də belə tədbirlərin ardıcıl keçirilməsini arzuladılar.
Konfransın ilk günündə “Aşıq Şəmşirin həyat və yaradıcılığı”, “Dədə Şəmşirin divanilərində sənətkarlıq”, “Aşıq poeziyasında dağ mövzusu”, “Aşıq şerinin semantik strukturu” və başqa mövzularda məruzələr dinlənildi.
Konfrans öz işini davam etdirir.
Bölmənin digər xəbərləri
