Avropa Parlamentinə seçkilər ərəfəsində Makronun populyarlıq reytinqi zəifləyir
Bakı, 9 yanvar, AZƏRTAC
Fransa Prezidenti Emmanuel Makron 2024-cü ili populyarlıq sorğularında acınacaqlı nəticələrlə başlayıb. Bu, onu iflas dərəcəsinə gətirib çıxarır və Avropa Parlamentinə iyunda keçiriləcək seçkilərdə ifrat sağçıların qələbəsinə imkan yaradır.
AZƏRTAC İspaniyanın “ABC” qəzetinə istinadla xəbər verir ki, fransızların 67-68 faizinin öz prezidentləri haqqında fikirləri “pis” və ya “çox pis”dir, bu da onu bütün əsas sosial sektorlardan - qadınlardan, fəhlələrdən, fermerlərdən və ya orta sinifdən uzaqlaşdırır, onun liberal peşələr, kiçik və orta biznes, nüfuzlu biznesmenlər və pensiyaçılar arasında dəstəyini azaldır.
Etimadın bu cür azalması Makronun təkrar Prezident seçilməsindən on səkkiz ay sonra hökumət böhranını sürətləndirə bilər.
2022-ci ilin mayında keçirilən seçkilərdə qələbəsindən sonra Emmanuel Makron bəyan edib ki, qadınlar və onların vəziyyəti onun fəaliyyətinin əsasını təşkil edəcək. Bununla belə, fransız qadınların, xüsusilə qızların böyük əksəriyyəti prezidentin təqib və cinsi təcavüzdə ittiham olunan məşhur aktyor Jerar Depardyöni müdafiə edən son açıqlamalarından özlərini “məyus” və “xəyanətə uğramış” hesab edir.
Bir neçə həftə əvvəl Fransa prezidenti, həmçinin parlamentin immiqrasiyaya nəzarətlə bağlı olan və ekspertlərin “geridə qalmış” hesab etdiyi qanun layihəsini təsdiqləməsindən sonra hökumət üzvlərinin narazılığı ilə üzləşib. Parlament çoxluğunun tənqidi ilə qarşı-qarşıya qalan Makron layihəni rədd etməklə hədələyən Konstitusiya Məhkəməsinə müraciət edib, bu da onun siyasi kövrəkliyini göstərir - Makron böyük islahatları zorla qəbul etdirmək üçün parlament çoxluğuna malik deyil, onun siyasi müttəfiqləri isə parçalanıb. Bu kövrəklik dövlət başçısının tamamilə tək olduğunu təsdiqləyir.
Nəşr vurğulayır ki, 2017-ci ildə ilk prezidentlik müddətinin əvvəlində Emmanuel Makron milli pensiya sistemində “böyük islahat”lar barədə vəd verib. Həmin ilin sonundan 2020-ci ilin əvvəlinə qədər Fransa dövlətinin başçısı onu geri addım atmağa məcbur edən təsirli etiraz nümayişləri dalğası yaşayıb. 2022-ci ildə təkrar seçilən Makron keçən il eyni layihəni ixtisar olunmuş vəziyyətdə bərpa edib. Layihə yenidən etirazlarla qarşılanıb və nəticədə Konstitusiya Məhkəməsi Fransada təqaüdə çıxma yaşının 62-64 yaş arasında dəyişəcəyi barədə qərar verib, halbuki Avropa İttifaqının digər ölkələrində bu, 65-67 yaş arasında dəyişir.
Lakin onunla orta sinfin nümayəndələri, fəhlələr və fermerlər arasındakı boşluq artıq göz qabağındadır. Onlar özlərini yüksək pensiya alan dövlət sektoru işçiləri üçün daha əlverişli islahatın qurbanı hesab edirlər.
“Böyük islahatı” ləğv edən prezident yüz gündən sonra - 2023-cü ilin mart-iyun aylarında Fransanın “yenilənməsi”ni elan etməyə tələsib. Yenidən uğursuz ambisiyalar!!! Ötən il polisdən qaçan yeniyetmə güllələndikdən sonra martın 16-dan mayın 3-dək Fransa növbəti iğtişaşlar dalğası yaşayıb. Parisin ətrafında və təxminən iyirmi böyük şəhərdə “Qara blok” təşkilatından anarxistlər peyda olub.
Mətbuat, radio və televiziya Emmanuel Makronun böhrana və hökumət dəyişikliyinə səbəb olduğunu açıq şəkildə bildirir. Səhiyyə naziri Orelyen Russo Milad zamanı artıq istefa verib. Ali təhsil və tədqiqatlar naziri Silvi Retaylo və mənzil tikintisi naziri Patris Vergriyet immiqrasiya nəzarəti ilə bağlı qanun layihəsinə qarşı düşmən mövqelərini ifadə ediblər. Mədəniyyət naziri Rima Əbdül Malak Depardyö ilə qalmaqala görə Makronla birlikdə siyasi “ölüm” qarşısındadır.
Davam edən bir sıra böhranlarla qarşılaşan fransızların 70-80 faizi hesab edir ki, Fransada “işlər pis gedir” və “hər şey daha da pisləşə bilər”. Məqalə müəllifinin yazdığına görə, üstəlik, fransızların 68 faizi sabiq Baş nazir Elizabet Born haqqında “pis” və ya “çox pis” fikrindədir.
İmmiqrasiyaya nəzarətə və ciddi şəkildə məhdudlaşdırılmasına yönəlmiş qanun layihəsini “triumf” adlandıran Makron təhlükəsizlik probleminin kəskin şəkildə pisləşdiyi Fransa əyalətlərini dinləməyə çalışaraq “qayda-qanuna hörmət” layihəsini dəstəkləyib: ölkənin ikinci şəhəri olan Marsel Qərbi Aralıq dənizinin cinayət paytaxtına çevrilib, Fransanın bir sıra şəhərlərinin merləri isə ötən il görünməmiş zorakılıq dalğasının, fiziki hücumların, təhqir və təhdidlərin qurbanı olublar.
Keçən ilin yazında şəhərətrafı bölgələrdə baş verən zorakılıq dalğasını şərh edən Emanuel Makron bildirib ki, onun fikrincə, Fransa “bir çox cinayət elementləri və qurumlara gizli təhdidlər”in, “desivilizasiya” və vəhşilik prosesinin qurbanı olub. Dövlət başçısının işlətdiyi “desivilizasiya” termini ifrat sağçı mütəfəkkir Reno Kamyunun kitabının adıdır və o, ondan Qərb cəmiyyətlərini “çürümək” riskindən xəbərdar etmək üçün istifadə edib.
Fransa prezidentinə etimadın iflası və gözlənilən hökumət böhranı çətin ki, Marin Lö Penin rəhbərlik etdiyi “Milli Birliyin” yüksəlişi ilə əlamətdar olan Fransa siyasətinin yeni istiqamətinə qarşı çıxsın. ABC vurğulayır ki, bu gün onun partiyası Fransada 2024-cü ilin iyununda Avropa Parlamentinə keçiriləcək seçkilərdə iştirak etmək niyyətində olan siyasi partiyalar arasında ilk sıradadır.
Bölmənin digər xəbərləri
